ភ្នំពេញ ៖ ខេមរសហព័ន្ធតេក្វាន់ដូ (World Tae kwondo) នាថ្ងៃទី២៧ ខែកញ្ញា ឆ្នាំ២០២៤ រៀបចំវគ្គបណ្តុះបណ្តាល គ្រូបង្វឹកកីឡាតេក្វាន់ដូ W T កម្រិតមូលដ្ឋាន ដល់គ្រូបង្វឹក នៅតាមបណ្តាលភ្នំពេញ និងខេត្តនានា នៅសាលហ្វឹកហាត់ ប៊ូយ៉ុង-ខ្មែរក្នុងពហុកីឡដ្ឋានជាតិអូឡាំពិក ក្រោមការប្រើប្រាស់ថវិកា ឧបត្ថម្ភប្រចាំឆ្នាំរបស់ក្រសួងអប់រំ យុវជន និងកីឡាដែលមានរយៈពេល ៤ ថ្ងៃ ។
ក្នុងឱកាសចាប់ផ្តើមសិក្សាជាផ្លូវការនាថ្ងៃទី២៧ ខែកញ្ញា ឆ្នាំ២០២៤ ដោយមានការអញ្ជើញ ចូលរួមពីសំណាក់ លោក គង់ សក្ខិដា អគ្គលេខាធិការរង នៃខេមរសហព័ន្ធតេក្វាន់ដូ តំណាងឲ្យលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានខេមរសហព័ន្ធតេក្វាន់ដូ និងលោក ឆយ យ៉ុងសុក គ្រូបង្វឹកជម្រើសជាតិ និងជាគ្រូឧទ្ទេស តំណាងឲ្យស្ថាប័ន KUKKIWON ។
លោក គង់ សក្ខិដា បានមានប្រសាសន៍ថា វគ្គគ្រូបង្វឹកកីឡាតេក្វាន់ដូ WT ខាងលើកនេះដោយមានសិក្ខាកាមចំនួន ២៤៦ នាក់មកភ្នំពេញ ខេត្តបាត់ដំបង ខេត្តសៀមរាប ខេត្តកណ្តាល ខេត្តបន្ទាយមានជ័យ ខេត្តកំពង់ឆ្នាំង និងខេត្តកំពង់ចាម ដែលមានរយៈពេល ៤ ថ្ងៃ ចាប់ពីថ្ងៃទី២៦ ដល់ថ្ងៃទី២៩ ខែធ្នូ ឆ្នាំ២០២៤ ។ វគ្គនេះផ្តោតសំខាន់ ទៅលើគ្រូបង្វឹក កីឡាតេក្វាន់ដូ WT ក្នុងការពង្រឹងសមត្ថភាព គ្រូបង្វឹកឲ្យកាន់តែច្បាស់ នូវការហ្វឹកហាត់សិស្សតាមក្លិបនៅ តាមបណ្តាលខេត្តនានា ក្នុងប្រទេសកកម្ពុជា ។
លោកអគ្គលេខាធិការរង បានបញ្ជាក់ថា វគ្គនេះ ជួយពន្លឿន ដល់ការអភិវឌ្ឍន៍ របស់ខេមរសហព័ន្ធ តេក្វាន់ដូ បានទាន់ ពេលវេលា និងសម្រាប់ជាឱកាស ដល់សិក្ខាកាមទាំងអស់ បានក្រេបយកចំណេះដឹងថ្មីៗ និងទទួលបាន នូវបទពិសោធន៍ ជាច្រើនទៀត ពីគ្រូបង្គោល ជាគ្រូបង្វឹក អន្តរជាតិត្រៀមខ្លួន ក្លាយជាគ្រូបង្វឹកថ្នាក់ជាតិ បន្តវេនជំនាន់ ក្រោយៗ ។ ហើយក៏ជាក្តីសង្ឃឹម សម្រាប់ខេមរសហព័ន្ធតេក្វាន់ដូ នៃការផ្សព្វផ្សាយ ប្រភេទកីឡាតេក្វាន់ដូWT ឲ្យបានទូលំទូលាយ ក្នុងក្របខណ្ឌទូទាំងប្រទេស នាពេលអនាគត ហើយក៏ត្រៀមខ្លួន សម្រាប់ការប្រកួតកីឡាតេក្វាន់ដូ WT ថ្នាក់ជាតិនានា ។
លោក គង់ សក្ខិដា បន្ថែមទៀតថា ការរៀបចំវគ្គ បណ្តុះបណ្តាល គ្រូបង្វឹកតេក្វាន់ដូ ថ្នាក់ជាតិនាពេលនេះ គោលដៅចង់ឲ្យ សិក្ខាកាម យកទៅបង្ហាត់ នៅ តាមទីតាំងរៀងៗខ្លួន សម្រាប់ត្រៀម ចូលរួមកម្មវិធីប្រកួតកីឡា តេក្វាន់ដូWT នានា ទាំងថ្នាក់ជាតិ និងអន្តរជាតិ ។ វគ្គនេះរក្សាបាននូវសុវត្ថិភាព-សុខភាពដល់សិក្ខាកាម និងអ្នកចូលរួម ទាំងអស់ ព្រមទាំងធ្វើឲ្យសិក្ខាកាមទាំងអស់ បានចំណាយពេល វេលាដ៏មានតម្លៃ ដើម្បីក្រេបយកចំណេះដឹង អំពីជំនាញគ្រូបង្វឹក កីឡាតេក្វាន់ដូWT នាពេលនេះ ៕
ដោយ៖លី ភីលីព
