ខេត្តកណ្តាល៖ ក្រុមបាល់ទាត់ យុវជន សុ្រកមុខកំពូល គ្រងតំណែងជើងឯក ក្នុងការប្រកួតកីឡាបាល់ទាត់យុវជនក្រោម ១៨ ឆ្នាំជ្រើសរើសជើងឯកខេត្តកណ្តាលប្រចាំឆ្នាំ២០២៥ ក្រោយពីក្រុមនេះបានយកឈ្នះលើក្រុមបាល់ទាត់ វិទ្យាល័យជ័យវរ្ម័នទី៧ កើតនៅផ្តាច់ព្រ័ត្រក្នុងលទ្ធផល ៣ទល់នឹង ១ នៅកីឡដ្ឋានបាល់ទាត់ខេត្តនៅក្រុងតាខ្មៅ ដោយការប្រកួតរៀបចំដោយការិយាល័យអប់រំកាយ និងកីឡា នៃមន្ទីរអប់រំ យុវជន និងកីឡាខេត្តកណ្តាលដើម្បីចម្រាញ់រកកីឡាករ-កីឡាការិនីវ័យក្មេងឆ្នើមប្រចាំខេត្ត។
ក្នុងឱកាសប្រគល់ជយលាភី និងមេដាយជូនក្រុមកីឡាករបាល់ទាត់នាថ្ងៃទី៣១ ខែមករា ឆ្នាំ២០២៥ ដោយមានការអញ្ជើញចូលរួមជាកិត្តិយសពីសំណាក់លោក ម៉ម ប៉ូលី អនុប្រធានមន្ទីរអប់រំ យុវជន និងកីឡាខេត្តកណ្តាលតំណាងលោក ចេង សំអុល ប្រធានមន្ទីរអប់រំ យុវជន និងកីឡាខេត្តកណ្តាល លោក ពៅ វណ្ណា ប្រធានការិយាល័យអប់រំកាយ និងកីឡា និងប្រធានការិយាល័យនានានៃមន្ទីរអប់រំខេត្ត។
ក្រុមបាល់ទាត់ យុវជន សុ្រកមុខកំពូល គ្រងតំណែងជើងឯក ក្រុមបាល់ទាត់ វិទ្យាល័យជ័យវរ្ម័នទី ៧ កើត គ្រងតំណែងជើងឯករង ក្រុមបាល់ទាត់ វិទ្យាល័យ សេរីភាព ទទួលបានចំណាត់ថ្នាក់លេខ ៣ បន្ទាប់ពីយកឈ្នះក្រុមបាល់ទាត់ បក្សីក្រហម នៅផ្តាច់ព្រ័ត្រក្នុងលទ្ធផល ២ទល់នឹង០ ដូច្នេះ ក្រុមបាល់ទាត់ បក្សីក្រហម ទទួលបានចំណាត់ថ្នាក់លេខ ៤ ទទួលបានប្រាក់រង្វាន់លើទឹកចិត្ត។
លោក ពៅ វណ្ណា ប្រធានការិយាល័យអប់រំកាយ និងកីឡាបាននិយាយថា ការប្រកួតកីឡាបាល់ទាត់យុវជនក្រោម ១៨ ឆ្នាំជ្រើសរើសជើងឯកខេត្តកណ្តាលប្រចាំឆ្នាំ២០២៥ គឺជាការប្រកួតមួយដើម្បីជ្រើសរើសកីឡាករប្រភេទកីឡាបាល់ទាត់ នេះសម្រាប់ត្រៀមចូលរួមការប្រកួតកីឡាកម្រិតថ្នាក់ជាតិទូទំាងប្រទេស។
ការប្រកួតកីឡាបាល់ទាត់នេះជាឱកាសមួយសម្រាប់កីឡាករសាកល្បងសមត្ថភាព បច្ចេកទេស ទេពកោសល្យ និង ជំនាញវិជ្ជាជីវៈរបស់ខ្លួន។ ព្រឹត្តិការណ៍កីឡានេះក៏បានរួមចំណែកដល់ការបង្កើនមូលធនសង្គម និងការសម្រេចបាន សុខដុមនីយកម្មក្នុងសង្គមជាតិ ស្របពេលប្រទេសកម្ពុជាយើង ត្រៀមឆ្ពោះទៅកាន់ព្រឹត្តិការណ៍ការប្រកួតកីឡាយុវជនអាស៊ីឆ្នាំ២០២៩ ដែលកម្ពុជានឹងធ្វើជាម្ចាស់ផ្ទះរៀបចំការប្រកួត។
ការប្រកួតឆ្នាំមាន ១៤ ក្រុម គឺ ក្រុមបាល់ទាត់ យុវជនព្រែកត្នោត ក្រុមបាល់ទាត់ តាខ្មៅសុ្រកយើង ក្រុមបាល់ទាត់ បក្សក្រហម ក្រុមបាល់ទាត់ វិទ្យាល័យ សេរីភាព ក្រុមបាល់ទាត់យុវជន វត្តសិរីបន្ទាយដែក ក្រុមបាល់ទាត់ វិទ្យាល័យជ័យវរ្ម័នទី៧ កើត ក្រុមបាល់ទាត់ វិទ្យាល័យជ័យវរ្ម័នទី៧ លិច ក្រុមបាល់ទាត់ ស្អាងយើងស្អាត និងក្រុមបាល់ទាត់ សាលារៀន វត្តបញ្ញាវ័ន្តខ្មែរ ក្រុមបាល់ទាត់។
ក្រុមបាល់ទាត់ សហភាពសហព័ន្ធយុវជនកម្ពុជា សង្កាត់តាក្តុល (ខេត្តកណ្តាល) ក្រុមបាល់ទាត់ វិទ្យាល័យ ពាមរាំង ក្រុមបាល់ទាត់ វិទ្យាល័យ ព្រែកស្លែង ក្រុមបាល់ទាត់ យុវជន សុ្រកមុខកំពូល និងក្រុមបាល់ទាត់ រដ្ឋបាលឃុំកំពុងស្វាយ៕
ដោយ៖ លី ភីលីព
