ភ្នំពេញ ៖ អ្នកស្រី សូ រ៉ាន់ដេត គ្រូបង្វឹកជម្រើសជាតិកីឡាទ្រីយ៉ាត្លុងកម្ពុជា និង អតីតកីឡាការិនីហែលទឹកឆ្នើម ព្រមទំាងជាកូនស្រី របស់អតីតកីឡាករហែលទឹក ជម្រើសជាតិកម្ពុជា និងកីឡាករជើងចាស់ឆ្នើម ដែលដណ្តើម បានមេដាយសំរិទ្ធ ក្នុងព្រឹត្តិការណ៍ការ ប្រកួតកីឡាអាស៊ីកាលពីឆ្នាំ១៩៦០ លោកព្រឹទ្ធាចារ្យ ផាត់ សំអ៊ុន បានទទួលមរណភាពដោយសារជំងឺ នាវេលាម៉ោង៨ និង៤១នាទី យប់ថ្ងៃទី១ ខែមេសា នេះ ។
អ្នកស្រី សូ រ៉ាន់ដេត មុននឹងក្លាយជាបង្វឹក ជម្រើសជាតិ កីឡាទ្រីយ៉ាត្លុងកម្ពុជា នាពេលបច្ចុប្បន្ន លោកស្រី ជាអតីតកីឡាការិនី ឆ្នើមរូបមួយ បន្ទាប់ពីឳពុក របស់លោកស្រីលោកព្រឹទ្ធាចារ្យ ផាត់ សំអ៊ុនបានចូលវត្តន៍ ក្រោយពីលោកស្រីនបន្តការហ្វឹកហាត់កីឡាហែលទឹក ដើម្បីបន្តតំណែងឳពុក ដោយសារឳពុករបស់លោកស្រី ជាកីឡាករហែលទឹកដំបូងគេ របស់ប្រទេសកម្ពុជា បានឈ្នះមេដាយសំរិទ្ធ ក្នុងព្រឹត្តិការណ៍ការប្រកួតកីឡាអាស៊ី នៅទីក្រុងបាងកក ប្រទេសថៃ កាលពីឆ្នាំ១៩៦០ ។
ការតស៊ូក្នុងវិស័យកីឡាកម្ពុជា លោកស្រីក៏បានក្លាយមន្រ្តីកីឡា របស់ក្រសួងអប់រំ យុវជន និងកីឡាមកដល់បច្ចុប្បន្ននេះ ។ អ្នកស្រី សូ រ៉ាន់ដេត បានចំណាយ ពេលវេលាដ៏មានតម្លៃជា ច្រើនសម្រាប់វិស័យកីឡាកម្ពុជា ជាពិសេសគ្រូបង្វឹក ជម្រើសជាតិ កីឡាទ្រីយ៉ាត្លុងកម្ពុជា ។ មុនព្រឹត្តិការណ៍ការប្រកួតកីឡា SEA GAME 2023 លើកទី៣២ ឆ្នាំ២០២៣ នៅប្រទេសកម្ពុជា លោកស្រីបានជំរុញឲ្យក្រុមកីឡាទ្រីយ៉ាត្លុងកម្ពុជា ធ្វើការហ្វឹកហាត់សកម្មភាព មិនគិតពីការនឿយ ហត់ឡើយ រហូត ដល់ក្រុមកីឡាករ-កីឡាការិនីទ្រីយ៉ាត្លុងកម្ពុជា ដណ្តើមមេដាយមាស ២ គ្រឿង និងមេដាយប្រាក់ ១គ្រឿងជូនប្រទេសជាតិ ។
សហព័ន្ធកីឡាទ្រីយ៉ាត្លុងកម្ពុជា និងសាច់ញាតិរបស់លោកស្រី សូ រ៉ាន់ដេត ផ្ទាល់បានប្រកាស លើបណ្តាញសង្គមថា អ្នកស្រី សូ រ៉ាន់ដេត បានទទួលមរណភាពដោយសារជំងឺ នាវេលាម៉ោង៨ និង៤១នាទី យប់ថ្ងៃទី១ ខែមេសា នេះ ។ កាលពីថ្ងៃទី១១ ខែធ្នូ ឆ្នាំ២០២៤ អ្នកកស្រី សូ សារ៉ាន់ឌី ដែលជាម្តាយ របស់អ្នកស្រី សូ រ៉ាន់ដេត បានទទួលមរណភាព ដោយសារជំងឺផងដែរក្នុងអាយុ៧១ឆ្នាំ៕
