កីឡា

កីឡាករបាល់បោះឆ្នើម ហ្វីលីពីន ប្រឈមនឹងការចោទប្រកាន់ ពីបទប្រើសារធាតុហាមឃាត់ ក្នុងកីឡាជាលើកទី២ ក្នុងរយៈពេល៣ឆ្នាំ

Photo by FIBA

ហ្វីលីពីន ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា កីឡាករបាល់បោះឆ្នើមហ្វីលីពីន លោក Justin Brownlee បានធ្វើតេស្តវិជ្ជមាន ចំពោះសារធាតុហាមឃាត់ ក្នុងកីឡា (Doping) ដោយប្រឈមមុខ នឹងការហាមប្រាមជាលើកទី២ បន្ទាប់ពីឈ្នះមេដាយមាសមួយ ក្នុងព្រឹត្តិការណ៍ការ ប្រកួតកកីឡាអាស៊ីឆ្នាំ ២០២៣ “2023 Asian Games” នៅប្រទេសចិន ។

សហព័ន្ធកីឡាបាល់បោះហ្វីលីពីន (SBP) បានបញ្ជាក់ថា ពួកគេបានទទួលរបាយការណ៍ លទ្ធផលអវិជ្ជមានពីការធ្វើតេស្តសារធាតុញៀនរបស់កីឡាករ Brownlee ។ SBP បានបន្ថែមថា SBP មានបំណងចង់បញ្ជាក់ឲ្យច្បាស់ថា FIBA មិនបានចេញសេចក្តី សម្រេចជាផ្លូវការណាមួយឡើយ។

ដោយអនុវត្តតាមនីតិវិធីស្តង់ដារ កីឡាករ Brownlee មានសិទ្ធិស្នើសុំការធ្វើតេស្តលើកទី២ បន្ទាប់ពីលទ្ធផលវិជ្ជមានដំបូង ហើយដំណើរការនេះ ត្រូវតែអនុវត្តដោយការចំណាយ របស់អង្គការ។

Philstar បានរាយការណ៍ថា SBP កំពុងធ្វើការជាមួយកីឡាករ Brownlee និងក្រុមច្បាប់របស់លោកនៅអាមេរិក ដើម្បីដោះស្រាយស្ថានភាពនេះ។ ប្រសិនបើការហាមឃាត់ត្រូវបានបញ្ជាក់លោក Brownlee អាចនឹងខកខាន ការប្រកួត FIBA Asia Cup  2025 ដែលគ្រោងនឹងធ្វើឡើង នៅប្រទេសអារ៉ាប៊ីសាអូឌីត ចាប់ពីថ្ងៃទី ៥ ដល់ថ្ងៃទី១៧ ខែសីហា ។

លោក Brownlee អាយុ ៣៦ ឆ្នាំត្រូវបានហាមប្រាម ៣ ខែ បន្ទាប់ពីធ្វើតេស្តវិជ្ជមានចំពោះសារធាតុហាមឃាត់នៅ Asian Games លើកទី១៩ នៅប្រទេសចិន ក្នុងឆ្នាំ ២០២៣ ជាកន្លែងដែលលោកបានដឹកនាំហ្វីលីពីន ឈ្នះមេដាយមាសជាលើកដំបូង របស់ពួកគេក្នុងរយៈពេល ៦១ ឆ្នាំក្នុងកីឡាបាល់បោះ 5×5 ។ លោកបានធ្វើតេស្តវិជ្ជមានចំពោះសារធាតុ Carboxy-THC ជាសមាសធាតុទាក់ទងនឹងកញ្ឆា។ ទោះបីជាមិនមែនជាថ្នាំបង្កើនប្រសិទ្ធភាពក៏ដោយ វាត្រូវបានហាមឃាត់ដោយទីភ្នាក់ងារប្រឆាំងសារធាតុហាមឃាត់ក្នុងកីឡាពិភពលោក (WADA)។

ព្រឹត្តិការណ៍ Asian Games លើកទី១៩ លោក Brownlee ជាអ្នកស៊ុតបញ្ចូលទីច្រើនជាងគេសម្រាប់ហ្វីលីពីនក្នុងការប្រកួតទាំង ៦ លើក។ ក្នុងវគ្គចែកពូល លោករកបាន ២០ ២២ និង ២៤ ពិន្ទុក្នុងការឈ្នះជាមួយបារ៉ែន ថៃ និងចាញ់ហ្ស៊កដានី។ ក្នុងវគ្គ ១/៤ ផ្តាច់ព្រ័ត្រ លោក Brownlee រកបាន ៣៦ ពិន្ទុដើម្បីជួយហ្វីលីពីន យកឈ្នះអ៊ីរ៉ង់ បន្ទាប់មកមាន ៣៣ ពិន្ទុក្នុងការឈ្នះលើចិន ហើយវគ្គផ្តាច់ព្រ័ត្រ លោក Brownlee បានរួមចំណែក ២០ ពិន្ទុជួយហ្វីលីពីនទទួលបានជ័យជម្នះលើហ្សកដានី។

នៅខែសីហា ឆ្នាំ ២០១៨ លោក Brownlee បានបង្ហាញពីបំណងចង់ក្លាយជាពលរដ្ឋហ្វីលីពីន ហើយវាត្រូវបានផ្តល់សិទ្ធិក្នុងខែមករា ឆ្នាំ ២០២៣ បន្ទាប់ពីប្រធានាធិបតី Ferdinand Marcos បានចុះហត្ថលេខាលើក្រឹត្យមួយដើម្បីផ្លាស់ប្តូរដំណើរការចូលសញ្ជាតិ។ លោក Brownlee បានដើរតួយ៉ាងសំខាន់ក្នុងការជួយហ្វីលីពីន ឈ្នះមេដាយមាសកីឡាបាល់បោះបុរស នៅព្រឹត្តិការណ៍ការប្រកួតកីឡា SEA Games 32 នៅកម្ពុជា និងក្រោយព្រឹត្តិការណ៍កីឡាអាស៊ីលើកទី១៩ ៕

Most Popular

To Top