ភ្នំពេញ៖កុមារីកម្ពុជា ២ រូបត្រៀមធ្វើដំណើរពីរាជធានីភ្នំពេញទៅទីក្រុងឡុងដ៍ដែលមានចម្ងាយដល់ទៅជិត ១៤,០០០ គីឡូម៉ែត្រ ដើម្បីចូលរួមកាន់ដៃកីឡាករបាល់ទាត់ល្បីៗរបស់ក្លឹបTottenham Hotspur ដើរក្នុងពិធីបើកការប្រកួតកីឡាបាល់ទាត់ Premier League នៅចក្រភាពអង់គ្លេសជាផ្លូវការ ហើយការធ្វើដំណើរនេះនឹងក្លាយជាបទពិសោធន៍ដ៏អស្ចារ្យ និងសំខាន់បំផុតក្នុងឆាកជីវិតរបស់ប្អូនៗ ដែលវាក៏ជាការចងចាំដ៏វិសេសវិសាលពេញមួយជីវិតថែមទៀតផង។
កុមារី ២ រូបមានអាយុ១២ និង១៣ឆ្នាំដែលជាសិស្សអង្គការផ្កាយសមុទ្រ និងជាកីឡាការិនីក្នុងកម្មវិធីបាល់ទាត់អង្គការផ្កាយសមុទ្រនឹងធ្វើដំណើរទៅកាន់ទីក្រុងឡុងដ៍ជាទីក្រុងប្រវត្តិសាស្ត្រពោរ ពេញទៅដោយសំណង់អគារបុរាណរាប់មិនអស់ ប្រជាជនចម្រុះជាតិសាសន៍ កន្លែងទេសចរណ៍ដ៏ទាក់ទាញគ្មានពីរជាច្រើន ជាពិសេសជាទីកន្លែងដែលក្រុមបាល់ទាត់ជើងខ្លាំងល្បីៗលំដាប់ពិភពលោកបានចាប់កំណើតឡើង។ នៅថ្ងៃទី១៦ ខែសីហាខាងមុខនេះ កុមារីកម្ពុជាទាំង២រូបនេះនឹងធ្វើជាកុមារដឹកដៃអមកីឡាករល្បីៗរបស់ក្លឹបបាល់ទាត់ Tottenham Hotspur ដើរក្នុងព្រឹត្តិការណ៍បើកការប្រកួត Premier League ដែលពួកគេនឹងប្រកួតតទល់នឹងក្រុមបាល់ទាត់ Burnley សម្រាប់រដូវកាល ២០២៥/២០២៦ ។
គួរបញ្ជាក់៖ការចំណាយក្នុងការធ្វើដំណើររបស់កុមារីទាំងពីររូបនេះគឺត្រូវបានផ្តល់ការគាំទ្រទាំងស្រុងដោយក្រុមហ៊ុនធានារ៉ាប់រងអាយុជីវិត និងសុខភាព អេ អាយ អេ ខេមបូឌា រួមមាន ថ្លៃសំបុត្រយន្តហោះ ទិដ្ឋាការ មធ្យោបាយធ្វើដំណើរ ការស្នាក់នៅ និងដំណើរកម្សាន្តទៅកាន់ ទីកន្លែងជាច្រើនក្នុងទីក្រុងឡុងដ៍ជាដើម។ នេះគឺជាការធ្វើដំណើរទៅក្រៅប្រទេសលើកដំបូងបង្អស់ក្នុងជីវិតរបស់ប្អូនៗទាំង ២ រូបនេះ ដែលសុទ្ធសឹងតែមកពីក្រុមគ្រួសារមានជីវភាពខ្វះខាត ។
ពេលនេះពួកគេមានឱកាសកាន់លិខិតឆ្លងដែន ដែលមានភ្ជាប់ទិដ្ឋាការ និងអង្គុយលើកៅអីយន្តហោះ ជាលើកដំបូងក្នុងឆាកជីវិតរបស់ពួកគេ។ ប្អូនៗទាំង ២នាក់ទទួលបានការរៀនសូត្រឡើងវិញ និងបាន បន្តទៅរៀននៅសាលារដ្ឋដោយមានការឧបត្ថម្ភគាំទ្ររបស់អង្គការផ្កាយសមុទ្រ ដោយពួកគេធ្លាប់បានបោះបង់ការសិក្សាអស់រយៈពេលជាច្រើនឆ្នាំដើម្បីជួយរកប្រាក់ចំណូលចិញ្ចឹមគ្រួសារ ។
ពីកុមារីធ្លាប់តែទាត់បាល់លើដីវាលមិនមានស្មៅក្នុងសហគមន៍ ដែលគេរស់នៅ ហើយបានក្លាយជាកុមារមានវាសនាអាចកាន់ដៃកីឡាករពិភពលោកល្បីៗដើរនៅលើទីលានស្មៅខៀវ ខ្ចីរបស់ Premier League គឺជាក្តីស្រមៃ ដែលកុមារីកម្ពុជាទាំង២រូបនេះពុំធ្លាប់បានគិតពីមុនមក នោះឡើយ ។
ការធ្វើដំណើរបស់កុមារៗទាំងនេះទៀតសោតនឹងអមដំណើរដោយ លោក សុខ បូរ៉ាន់ ជាមន្ត្រីសម្របសម្រួលកម្មវិធីបាល់ទាត់របស់អង្គការផ្កាយសមុទ្រ អ្នកស្រី ជួប វិច្ឆិកា អគ្គនាយិកាប្រតិបត្តិរបស់អង្គការផ្កាយសមុទ្រ និងតំណាងក្រុមហ៊ុនធានារ៉ាប់រងអាយុជីវិត និងសុខភាព អេ អាយ អេ ខេមបូឌា៕
ដោយ៖ លី ភីលីព
