ម៉ាឡេស៊ី ៖ ក្រុមអាជ្ញាកណ្ដាល ចៅក្រម គ្រូបង្វឹក គ្រូជំនួយ កីឡាករ និងកីឡាការិនីការ៉ាតេកម្ពុជាចំនួន ៩នាក់បានបញ្ចប់ការប្រកួតកីឡាការ៉ាតេ WKF Karate 1 Series A 2025 នៅប្រទេសម៉ាឡេស៊ី ដើម្បីស្ទាប់ស្ទងសមត្ថភាព និងគុណផលផ្នែកកាតា ក្រោយពីទទួលហ្វឹកហាត់ជាមួយគ្រូបង្វឹកបរទេស ដើម្បីពិនិត្យមើលចំណុចពិសេស និងចំណុចខ្សោយណាខ្លះរបស់កីឡាករ-កីឡាការិនី កីឡាការ៉ាត ត្រៀមចូលរួមប្រកួតកីឡាស៊ីហ្គេមលើកទី៣៣ ឆ្នាំ២០២៥ នៅថៃ និងការប្រកួតកីឡាលក្ខណៈអន្តរជាតិនានា ។
លោក ហេង ផេង គ្រូបង្វឹក(គ្រូធំ) បានប្រាប់តាមអនឡាញពីម៉ាឡេស៊ី ឲ្យដឹងថា ការប្រកួត កីឡាការ៉ាតេ WKF Karate 1 Series A Kuala Lumpur នៅប្រទេស ម៉ាឡេស៊ី ចាប់ពីថ្ងៃទី ៣ដល់ថ្ងៃទី៥ ខែតុលា ២០២៥ មាន ៨០ ប្រទេសបានចុះឈ្មោះ ចូលរួម ក្នុងនោះអត្តពលិកសរុប ១០៤១ នាក់ នារីមានចំនួន ៤២៧នាក់ មាន ១៤ វិញ្ញាសា។ សម្រាប់ សហព័ន្ធការ៉ាតេកម្ពុជា បាន បញ្ជូន អត្តពលិក កាតា ក្រុមបុរស ( ៣នាក់) និង កាតា ក្រុម នារី (៣នាក់) ចូលរួម នៅក្នុងព្រឹត្តិការណ៍ ពិភពលោក ដ៏ធំមួយនេះ។
លោក ហេង ផេង បានបញ្ជាក់ថា កាតា ក្រុម នារី មាន ១៤ ប្រទេស ចំណែកប្រទេសចិនឈ្នះមេដាយមាស ប៉េរូ ឈ្នះមេដាយប្រាក់ ឥណ្ឌូនេស៊ីឈ្នះសំរិទ្ធ វៀតណាមជាប់ចំណាត់ថ្នាក់លេខ ៤ តៃប៉ិជាប់ចំណាត់ថ្នាក់លេខ ៥ និងអ៊ីតាលីជាប់ចំណាត់ថ្នាក់លេខ ៦ ។ ការប្រកួតមាន ១៧ ក្រុម ចែកចេញជា២ពូល។ កាតា ក្រុម នារី ប្រកួត ៖ នៅ Tatami 1 Pool 1/2 ប្រកួតនៅជុំទី១ កប្រកួត ចាញ់ កាតាក្រុម នារី ប្រទេសអ៊ីតាលី ក្នុងនោះអ៊ីតាលី ទទួលបានពិន្ទុ ៣៨.៣០ និងកម្ពុជាទទួលបានពិន្ទុ ៣៧:១០។
ចំណែកកាតាក្រុម បុរស មាន ១៤ ប្រទេសចូលរួម មាន ២១ក្រុម ចែកចេញជា២ ពូល។ កាតាក្រុម បុរស ៖នៅ Tatami 5 Pool 2/2 ប្រកួតនៅជុំទី២ កម្ពុជាប្រកួត ចាញ់ កាតាក្រុម បុរស ប្រទេសឥណ្ឌូនេស៊ី ក្នុងនោះឥណ្ឌូនេស៊ីទទួលបានពិន្ទុ ៣៦.៩០ និងកម្ពុជាទទួលបានពិន្ទុ៣៦:០០៕
ដោយ៖លី ភីលីព
