បារ៉ែន៖ នាយប់ថ្ងៃទី២ ខែតុលា ឆ្នាំ២០២៥ លោក ប៉ុន សុខ អគ្គនាយកនៃអគ្គនាយកដ្ឋានកីឡា និងជាអនុប្រធានប្រតិភូកម្ពុជាតំណាងលោក ថោង ខុន ប្រធានគណៈកម្មាធិការជាតិអូឡាំពិកកម្ពុជា និងជាប្រធានប្រតិភូកម្ពុជាដឹកនាំប្រតិភូ គ្រូបង្វឹក កីឡាករ -កីឡាការិនីកម្ពុជាចូលរួមពិធីបិទព្រឹត្តិការណ៍ប្រកួតកីឡាយុវជនអាស៊ីហ្គេម “ASIAN YOUTH GAMES 2025” លើកទី៣ នៅព្រះរាជាណាចក្របារ៉ែនបានមកដល់កម្ពុជាវិញហើយ។
ការត្រឡប់មកវិញប្រទេសកម្ពុជា លោក ប៉ុន សុខ បានដឹកនាំក្រុមកីឡាករ-កីឡាការិនីចំនួន ៦ ប្រភេទរួមមានកីឡា យូដូ កីឡាវាយសី កីឡាលើកទម្ងន់ កីឡាជីជឺតស៊ូ កីឡាវាយកូនឃ្លីលើតុ និងកីឡាហែលទឹក ព្រមទំាងគណៈប្រតិភូកម្ពុជាជាច្រើនរូបទៀត។
កម្ពុជាកម្ពុជាឈរចំណាត់ថ្នាក់លេខ ៣១ នៃតារាងមេដាយក្នុងព្រឹត្តិការណ៍ប្រកួតកីឡាយុវជនអាស៊ី លើកទី៣ (3rd Asian Youth Games 2025) នៅប្រទេសបារ៉ែន ដោយដណ្តើមបានមេដាយ ៤ គ្រឿង ខណៈប្រទេសចិនឈរចំណាត់ថ្នាក់លេខ១ ឈ្នះមេដាយសរុប ១៤៧ គ្រឿង ដែលប្រកួតប្រព្រឹត្តទៅចាប់ពីថ្ងៃទី២២ ដល់ ថ្ងៃទី៣១ ខែតុលា ឆ្នាំ២០២៥ ។
តារាងមេដាយសរុបចុងក្រោយនៃព្រឹត្តិការណ៍ប្រកួតកីឡាយុវជនអាស៊ីហ្គេម លើកទី៣ នៅប្រទេសបារ៉ែនបានបង្ហាញជាផ្លូវការហើយ ក្នុងនោះប្រទេសកម្ពុជាឈរចំណាត់ថ្នាក់លេខ ៣១ ដណ្តើមបានមេដាយ ៤ គ្រឿង រួមមានមេដាយប្រាក់ ២ គ្រឿង និងមេដាយសំរិទ្ធ ២គ្រឿង ។ ប្រទេសចិនឈរចំណាត់ថ្នាក់លេខ ១ ដណ្តើមមេដាយសរុប ១៤៧ គ្រឿង ក្នុងនោះមេដាយមាស ៦៣ គ្រឿង មេដាយប្រាក់ ៤៩ គ្រឿង និងមេដាយសំរឹទ្ធ ៣៥ គ្រឿង ។
ចំណែកអ៊ុយបេគីស្ថានឈរចំណាត់ថ្នាក់លេខ ២ ដណ្តើមមេដាយសរុប ៨១ គ្រឿង មេដាយមាស ៣៧ គ្រឿង មេដាយប្រាក់ ១៦ គ្រឿង និងមេដាយសំរិទ្ធ ២៨ គ្រឿង និងកាហ្សាកស្ថាន ឈរចំណាត់ថ្នាក់លេខ៣ ដណ្តើមមេដាយសរុប ៩៣ គ្រឿង មេដាយមាស ២៤ គ្រឿង មេដាយប្រាក់ ២៩ គ្រឿង និងមេដាយសំរិទ្ធ ៤០ គ្រឿង៕
ដោយ៖លី ភីលីព
