ភ្នំពេញ ៖ សហព័ន្ធកីឡាកីឡាទាញព្រ័ត្រកម្ពុជា បានសហការជាមួយរដ្ឋបាលខេត្តព្រះសីហនុ រៀបចំព្រឹត្តិការណ៍ប្រកួតកីឡាទាញព្រ័ត្រ ជ្រើសរើសជើងឯកថ្នាក់ជាតិ ឆ្នាំ២០២៥ និងការប្រកួតមិត្តភាពជាតិ-អន្តរជាតិ ពានរង្វាន់លោក ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ លើកទី១ ឆ្នាំ២០២៥ ដើម្បីចូលរួម អបអរសាទរខួបលើកទី១០ នៃការដាក់បញ្ចូលល្បែងទាញព្រ័ត្រ ក្នុងបញ្ជីបេតិកភណ្ឌពិភពលោក របស់អង្គការយូណេស្កូចាប់ពីថ្ងៃទីថ្ងៃទី១-៣ខែធ្នូ ឆ្នាំ២០២៥ នៅទីលានតេជោ ខេត្តព្រះសីហនុ។
ការៀបចំព្រឹត្តិការណ៍ប្រកួតកីឡាទាញព្រ័ត្រ ជ្រើសរើសជើងឯកថ្នាក់ជាតិ ឆ្នាំ២០២៥ ដោយសហព័ន្ធកីឡាកីឡាទាញព្រ័ត្រកម្ពុជានេះ ក្រោមការប្រើប្រាស់ថវិកាគាំទ្រប្រចាំឆ្នាំរបស់ក្រសួងអប់រំ យុវជន និងកីឡា ដែលឆ្នាំនេះមានសមាគម និងក្លិបចូលរួមចំនួន ១៤ គណៈប្រតិភូ គ្រូបង្វឹក និងកីឡាករ-កីឡាការិនី ២៤៥ នាក់ក្នុងនោះ ប្រតិភូចំនួន ១៩ នាក់ គ្រូបង្វឹកចំនួន ២៧នាក់ កីឡាករចំនួន ១១៨ នាក់និងកីឡាការិនី ៨១ នាក់។
ចំណែកសមាគម និងក្លិបចូលរួមចំនួន ១៤ រួមមាន សមាគមកីឡាក្រសួងមហាផ្ទៃ បញ្ជការដ្ឋាន កងទ័ពជើងទឹក សមាគមកីឡាក្រសួងការពារជាតិ អង្គភាពកីឡានគរបាល ភ្នំពេញ ខេត្តព្រះសីហនុ ខេត្តស្វាយរៀង ខេត្តកំពង់ឆ្នាំង ខេត្តបាត់ដំបង ខេត្តកណ្តាល ខេត្តកែប ខេត្តកំពង់ស្ពឺ ខេត្តកំពត និងខេត្តតាកែវ។ ការប្រកួតមាន ៤ វិញ្ញាសា គឺវិញ្ញាសាបុរស ៨ នាក់ទល់នឹង ៨ នាក់ វិញ្ញាសានារី ៨ នាក់ទល់នឹង ៨ នាក់ វិញ្ញាសាបុរស ៤ នាក់ទល់នឹង ៤ នាក់ និងវិញ្ញាសានារី ៤ នាក់ទល់នឹង ៤ នាក់៕
