ប៉ារីស ៖ យោងតាមការចេញ ផ្សាយពីគេហទំព័រ Japan Today បានប្រាប់ឲ្យដឹងថា ក្រុមបាល់ទាត់ Aston Villa បានកក់កៅអីវគ្គ ១៦ ក្រុមចុងក្រោយ នៃពានរង្វាន់ Europa League កាលពីថ្ងៃព្រហស្បតិ៍ ជាមួយនឹងជ័យជម្នះ ១-០ នៅ Fenerbahce ខណៈក្រុម Celtic បានខ្ជះខ្ជាយគ្រាប់បាល់ នាំមុខ ២ គ្រាប់ទល់នឹងក្រុម Bologna ដែលធ្វើឲ្យក្តីសង្ឃឹមឡើងទៅវគ្គបន្តរបស់ពួកគេត្រូវបានបាត់បង់។
ការតែតបាល់បញ្ចូលទីរបស់កីឡាករ Jadon Sancho នៅពាក់កណ្តាលតង់ទី១ នៅទីក្រុងអ៊ីស្តង់ប៊ុល បានធ្វើឲ្យក្រុម Villa ទទួលបានជ័យជម្នះលើកទី ៦ ក្នុងចំណោមការប្រកួតចំនួន ៧ នៅអឺរ៉ុប ដោយទទួលបានកៅអីមួយក្នុងក្រុមកំពូលទាំង ៨ និងធ្វើឲ្យក្រុមរបស់ Unai Emery រំលងវគ្គជម្រុះ។
Matty Cash បានស៊ុតបញ្ចូលទី នៅតង់ទី២ ហើយក្រុម Villa បានរក្សាការវាយបក ខណៈអ្នកចាំទី Marco Bizot បានបង្កើតការសង្គ្រោះ ដ៏សំខាន់ជាបន្តបន្ទាប់ ដោយក្រុម Fenerbahce ព្យាយាមរកគ្រាប់បាល់តាមស្មើ។ ក្រុម Villa ស្ថិតនៅលំដាប់ទី ២លើតារាង ដោយមាន ១៨ ពិន្ទុ និងនៅពីក្រោយក្រុម Lyon ត្រឹមតែគ្រាប់បាល់ប៉ុណ្ណោះ។ ក្រុម Lyon បានឈ្នះ ១-០ នៅក្រុម Young Boys របស់ស្វីស ដើម្បីធានាកៅអីរបស់ពួកគេក្នុងវគ្គ ១៦ ក្រុមចុងក្រោយ ។
ក្រុម Celtic បានត្រឹមស្មើ ២-២ នៅក្រៅទឹកដីជាមួយក្រុម Bologna ធ្វើឲ្យពួកគេស្ថិតនៅតំបន់គ្រោះថ្នាក់ នៃការបរាជ័យសម្រាប់ឡើងពីវគ្គជម្រុះ។ ក្រុមរបស់លោក Martin O’Neill បាននាំមុខតាមរយៈការស៊ុតបញ្ចូលទីដំបូង របស់ Reo Hatate ប៉ុន្តែកីឡាករអន្តរជាតិជប៉ុនរូបនេះ ត្រូវបានបណ្តេញចេញពីការប្រកួត ដោយសារកាតលឿងលើកទី ២ នៅនាទីទី ៣៤៕
