អង់គ្លេស ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា អតីតកីឡាករបាល់ទាត់ឆ្នើមអង់គ្លេស លោក David Beckham រកចំណូលបាន ២៥ លានដុល្លារអាមេរិក ក្នុងរយៈពេលត្រឹម តែមួយខែប៉ុណ្ណោះ ដោយសារកិច្ចសន្យាផ្សាយពាណិជ្ជកម្ម ជាច្រើនដែលជាប់ទាក់ទង នឹងព្រឹត្តិការណ៍បាល់ទាត់ពិភពលោកឆ្នាំ ២០២៦ “2026 World Cup” នឹងមកដល់នៅអាមេរិកខាងជើង។
នេះបើយោងតាមរបាយការណ៍របស់ Daily Mail ថា លោក Beckham បានចុះកិច្ចព្រមព្រៀងផ្សព្វផ្សាយសំខាន់ៗ ជាមួយម៉ាកល្បីៗ ជាច្រើនលើពិភពលោក។ ទោះបីជាបានចូលនិវត្តន៍ ពីបាល់ទាត់អាជីពជាងមួយទសវត្សរ៍មុនក៏ដោយ ម៉ាកផ្ទាល់ខ្លួន របស់គាត់បច្ចុប្បន្នត្រូវបានវាយតម្លៃថា រឹងមាំជាងពេលណាៗទាំងអស់។ អ្នកនៅខាងក្នុងកត់សម្គាល់ថា គាត់អាចរកចំណូលបានច្រើនជាងពេល ដែលគាត់រកបានក្នុងអំឡុងពេលកំពូល នៃអាជីពបាល់ទាត់របស់គាត់ ។
នេះបើយោងតាមទស្សនាវដ្តី Forbes បានបញ្ជាក់ថា ក្នុងអំឡុងពេលឆ្នាំមាសរបស់គាត់នៅលើទីលាន ប្រាក់ចំណូលសរុបរបស់អតីតកីឡាករ បាល់ទាត់ឆ្នើមអង់គ្លេស លោក David Beckham មានប្រហែល ៤០-៤៥ លានដុល្លារក្នុងមួយឆ្នាំពីប្រាក់ខែ និងការផ្សព្វផ្សាយ ដែលស្មើនឹងជាង ៣ លានដុល្លារក្នុងមួយខែ ។
មុនព្រឹត្តិការណ៍បាល់ទាត់ពិភពលោករដូវក្ដៅនេះ លោក Beckham បានទទួលបានកិច្ចព្រមព្រៀងធំៗជាមួយសាជីវកម្ម និងម៉ាកល្បីៗជាច្រើន រួមមាន Lay’s, Fanatics, Bank of America និង Verizon។ ក្នុងអំឡុងពេលនៃការប្រកួត កីឡាករបាល់ទាត់ដ៏ល្បីល្បាញរូបនេះក៏នឹងចូលរួមក្នុងយុទ្ធនាការផ្សព្វផ្សាយពាណិជ្ជកម្មសម្រាប់ McDonald’s និង Adidas ផងដែរ។
យោងតាមកាសែត The Mirror បានចេញផ្សាយថា មូលដ្ឋានអ្នកគាំទ្ររបស់លោក Beckham នៅអាមេរិក និងអាមេរិកខាងត្បូងកំពុងកើនឡើងយ៉ាងឆាប់រហ័ស។ អរគុណចំពោះថ្ងៃលេងរបស់គាត់ក្នុងប្រទេសអេស្ប៉ាញ និងតួនាទីរបស់គាត់ជាសហម្ចាស់ក្លឹប Inter Miami CF ក្នុងលីគកំពូល Major League Soccer៕
