ភ្នំពេញ៖លោក ប៉ុន សុខ អគ្គនាយក នៃអគ្គនាយកដ្ឋានកីឡា និងអគ្គលេខាធិការ សហព័ន្ធកីឡាសិស្សនិស្សិតកម្ពុជា បានមានប្រសាស៍ថា កម្ពុជា នឹងបញ្ជូនក្រុមកីឡាករ-កីឡាការិនីជាសិស្ស-និស្សិតចំនួន ៨ ប្រភេទកីឡាចូលរួមការ ប្រកួតកីឡាសាកលវិទ្យាល័យអាស៊ាន លើកទី២២ (The 22 ASEAN University Games) នាខែធ្នូ ឆ្នាំ២០២៦ នៅប្រទេសម៉ាឡេស៊ី ខណៈកម្ពុជាក៏ត្រៀមបញ្ជូនក្រុមប្រតិភូ អត្តពលិក សិល្បករ សិល្បការិនីចូលរួមប្រកួត និងសម្តែងបង្ហាញសិល្បៈវប្បធម៌ ក្នុងពិធីទទួលទង់បន្តវេនឆ្ពោះមកធ្វើម្ចាស់ផ្ទះ នៅកម្ពុជា នាឆ្នាំ២០២៨ខាងមុខ។
លោក អគ្គលេខាធិការ សហព័ន្ធកីឡាសិស្ស និស្សិតកម្ពុជា បានបន្ថែមថា ការប្រកួតកីឡាសាកលវិទ្យាល័យ អាស៊ានលើកទី២២ (The 22 ASEAN University Games) ឆ្នាំ២០២៦ នៅម៉ាឡេស៊ី គ្រោងនឹងប្រព្រឹត្តិទៅ ចាប់ពីថ្ងៃទី១០-១៩ ខែធ្នូ ឆ្នាំ២០២៦។ បច្ចុប្បន្ន កម្ពុជាកំពុងត្រៀមកីឡាករ-កីឡាការិនី៨ប្រភេទកីឡា ត្រៀមចូលរួមប្រកួតកីឡាសាកលវិទ្យាល័យអាស៊ាន លើកទី២២ នៅប្រទេសម៉ាឡេស៊ី ឆ្នាំ២០២៦ ដោយកម្ពុជាបានចុះឈ្មោះប្រភេទកីឡា ដែលមានសក្តានុពល ដែលសហព័ន្ធកីឡាសិស្សនិស្សិតកម្ពុជា សហការជាមួយអង្គភាពពាក់ព័ន្ធ និងសហព័ន្ធកីឡាជាតិពាក់ព័ន្ធ ។
លោក ប៉ុន សុខ សង្កត់ធ្ងន់ថា ការចូលរួមប្រកួតកីឡាសាកលវិទ្យាល័យអាស៊ាន ឆ្នាំ២០២៦ នៅប្រទេសម៉ាឡេស៊ីនេះ គឺជាការប្រកួតចុងក្រោយរបស់កម្ពុជា ដោយត្រូវចូលរួមពិធីទទួលទង់បន្តវេនឆ្ពោះមកធ្វើម្ចាស់ផ្ទះ ការប្រកួតកីឡាសាកលវិទ្យាល័យអាស៊ាន លើកទី២៣ នាឆ្នាំ២០២៨ខាងមុខ។ មានន័យថា យើងត្រៀមបញ្ជូនប្រតិភូ អត្តពលិក សិល្បករ សិល្បការិនីចូលរួមប្រកួត និងសម្តែងក្នុងពិធីទទួលទង់បន្តវេនពីម្ចាស់ផ្ទះម៉ាឡេស៊ី ឆ្នាំ២០២៦ ឆ្ពោះមកកម្ពុជា នាឆ្នាំ២០២៨ ដោយយើងត្រូវរៀបចំផែនការមេ សម្រាប់ការអនុវត្តសិទ្ធិធ្វើម្ចាស់ផ្ទះបន្តវេន ឆ្នាំ២០២៨តែម្តង ដូចកាលពីកម្ពុជាទទួលធ្វើម្ចាស់ផ្ទះ ស៊ីហ្គេម លើកទី៣២ និងអាស៊ានប៉ារ៉ាហ្គេម ឆ្នាំ២០២៣កន្លងទៅដែរ។
អគ្គនាយកកីឡាបានបញ្ជាក់ថា យើងទទួលបានគោលការណ៍ពីរាជរដ្ឋាភិបាលរួចហើយ ក្នុងការអនុញ្ញាតឱ្យក្រសួងអប់រំ យុវជន និងកីឡាទទួលធ្វើម្ចាស់ផ្ទះ ការប្រកួតកីឡាសាកលវិទ្យាល័យអាស៊ាន ដែលមាន១១ប្រទេសចូលរួម។ ក្នុងនោះក៏កម្ពុជា បានកំណត់នូវការត្រៀមប្រភេទកីឡាមួយចំនួនចំបាច់ និងសក្តានុពលផងដែរ ដែលកម្ពុជាគ្រោង នឹងត្រៀមប្រភេទកីឡាក្នុងរង្វង់ ១៥ ទៅ ១៨ប្រភេទកីឡា ។
លោកពន្យល់ថា ការកំណត់ចំនួន ប្រភេទកីឡានេះមិនដូចទម្រង់ការប្រកួតស៊ីហ្គេមនោះទេ ដោយស្ថិតក្នុងក្របខ័ណ្ឌ អត្តពលិកជាសិស្ស-និស្សិត ខណៈការរៀបចំ គឺស្ថិតក្រោមសិទ្ធិរបស់សហព័ន្ធកីឡាសិស្សនិស្សិត ដោយមិនមែនការ ជាការរៀបចំក្នុងកម្រិតហ្គេម ក្រោមការរៀបចំ របស់អូឡាំពិកហ្គេម អាស៊ីហ្គេម និងស៊ីហ្គេម នោះទេ ពោលគឺស្ថិតក្នុងក្រប ខ័ណ្ឌអប់រំ ដែលកីឡាករ កីឡាការិនីជាសិស្ស-និស្សិត៕
