លោក Elon Musk នាយកប្រតិបត្តិ Tesla បានធ្វើការឆ្លើយតបភ្លាមៗ ទៅនឹងការបញ្ចេញមតិមកលើប្រព័ន្ធ Autopilot របស់ Tesla ពីសំណាក់លោក John Krafcik នាយកប្រតិបត្តិក្រុមហ៊ុន Waymo ដែលជាក្រុមហ៊ុនអភិវឌ្ឍន៍ បច្ចេកវិទ្យាបើកបរស្វ័យប្រវត្តិមួយ ជាក្រុមហ៊ុនសាខា របស់ក្រុមហ៊ុន Alphabet។
តាមរយៈគណនី Twitter លោក Elon Musk បាននិយាយដូចនេះថា ៖ “ក្នុងការយល់ឃើញរបស់ខ្ញុំ Tesla មាន Hardware និង Software AI ដែលល្អជាង Waymo ទៅទៀត។”
គួរដឹងថាលោក Krafcik បាននិយាយក្នុងកិច្ច សម្ភាសន៍កាលពីថ្មីៗនេះ ថា រូបលោកមិនបានចាត់ទុក Tesla ជាគូប្រជែងរបស់ Waymo នោះទេ ដោយបានបន្ថែមថា Tesla មិនមែនកំពុងតែអភិវឌ្ឍន៍ប្រព័ន្ធបើកបរ ស្វ័យប្រវត្តិពេញទីនោះទេ ប៉ុន្តែគឺជាជំនួយការ បើកបរដ៏ល្អមួយទៅវិញទេ។
នេះក៏ដោយសារប្រព័ន្ធ Autopilot របស់ Tesla នៅទាមទារឲ្យមានអ្នកបើកបរ ដែលមានប័ណ្ណបើកបរត្រូវនៅកាន់ចង្កូត រថយន្តដើម្បីត្រួតពិនិត្យប្រព័ន្ធ បើកបរស្វ័យប្រវត្តិ ដើម្បីអាចបញ្ជាបន្ថែមនៅពេលដែលចាំបាច់ ៕ sabay
