សេនហ្វ្រេនស៊ីស្កូ៖ ក្រុមហ៊ុនបច្ចេកវិទ្យាយក្សសហរដ្ឋអាមេរិក Microsoft បានចាប់ផ្តើមដំណើរការសាកល្បងនៃការអនុញ្ញាត ឲ្យមនុស្សលេងហ្គេម Cloud ដោយប្រើឧបករណ៍ចល័ត ក្រុមហ៊ុនផលិតiPhone Apple ក៏ដូចជាកុំព្យូទ័រដើរដោយ Windows យោងតាមការចេញផ្សាយពីគេហទំព័រជប៉ុនធូដេ។
ការធ្វើតេស្តិ៍តូចតាចនេះ បានរីករាលដាលពាសពេញ ២២ ប្រទេសគឺជាជំហាន មួយរបស់អ្នកបង្កើតហ្គេម Xbox ដើម្បីអនុញ្ញាតឲ្យលេងហ្គេម តាមកន្លែងកម្សាន្តដោយប្រើស្មាតហ្វូន ថេប្លេត ឬកុំព្យូទ័រផ្ទាល់ខ្លួន ហើយបញ្ជីឈ្មោះប្រទេសរួមមានអង់គ្លេស បារាំង និងសហរដ្ឋអាមេរិក។
លោក Catherine Gluckstein អនុប្រធានគម្រោងនេះបាននិយាយនៅក្នុងប្លុកមួយថា នេះគឺជាជំហានដ៏គួរឲ្យរំភើបមួយនៅក្នុងដំណើររបស់យើងដើម្បីនាំយកហ្គេមទៅឲ្យអ្នកលេងចំនួន ៣ ពាន់លាននាក់នៅជុំវិញពិភពលោក។ លោក Gluckstein បានបន្តថា ចំនួនអតិថិជនដែលមានកំណត់នៃហ្គេម Xbox Game Pass Ultimate នឹងទទួលបានលិខិតអញ្ជើញដើម្បីអាចចូលមើលកាតាឡុករាប់រយចំណងជើងតាមរយៈកម្មវិធីរុករកបណ្តាញអ៊ីនធើណេត Edge, Chrome ឬ Safari។
ក្រុមហ៊ុន Microsoft គ្រោងនឹងធ្វើឲ្យជម្រើសនេះអាចប្រើបានសម្រាប់អតិថិជនចុងក្រោយទាំងអស់នៅក្នុងប៉ុន្មានខែខាងមុខនេះប្រសិនបើការធ្វើតេស្តិ៍នេះដំណើរការល្អ។ យោងតាមតួលេខបានចេញផ្សាយកាលខែមករាដោយប្រធានក្រុមហ៊ុន Microsoft លោក Satya Nadella បានឲ្យដឹងថា Xbox Game Pass មានអតិថិជនជាវចំនួន ១៨ លាននាក់នៅទូទាំងពិភពលោកនៅចុងឆ្នាំនេះ៕ ដោយ៖លី ភីលីព
