BRICS រៀបចំ បង្កើតបណ្តាញផ្កាយរណប ចាប់សញ្ញា ពីចម្ងាយ ដើម្បីជួយដោះស្រាយ បញ្ហាប្រឈម សកល

ចិន៖ប្រទេសចិននឹងធ្វើការជាមួយ រុស្ស៊ី ឥណ្ឌា ប្រេស៊ីល និងអាហ្វ្រិកខាងត្បូង ដើម្បីបង្កើតបណ្តាញផ្កាយរណបដែលអាចចាប់សញ្ញាពីចម្ងាយក្នុងការជួយដោះស្រាយ បញ្ហាប្រឈមសកលដូចជាការប្រែប្រួល អាកាសធាតុ គ្រោះមហន្តរាយធំ ៗ និងការធ្លាក់ចុះនៃបរិស្ថានយោងតាមការចេញផ្សាយ ពីគេហទំព័រឆៃណាឌៀលី។

យោងតាមសេចក្តីថ្លែងការណ៍មួយ ដែលត្រូវបានចេញផ្សាយនៅយប់ថ្ងៃពុធ ដោយរដ្ឋបាលអវកាសជាតិចិន “CNSA” ថា ប្រធានទីភ្នាក់ងារអវកាសជាតិនៅប្រទេស BRICS បានជួបប្រជុំគ្នានៅថ្ងៃពុធនេះតាមរយៈ វីដេអូភ្ជាប់និងចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការលើផ្កាយរណប BRICS Remote Sensing ។ កិច្ចព្រមព្រៀងនេះ អនុញ្ញាតឲ្យមានកិច្ចសហប្រតិបត្តិការក្នុងចំណោមទីភ្នាក់ងារអវកាស BRICS ដើម្បីបង្កើតបណ្តាញផ្កាយ រណបចាប់សញ្ញា ពីចម្ងាយដែលជាយន្តការចែករម្លែកទិន្នន័យ។

សេចក្តីថ្លែងការណ៍បាននិយាយថា CNSA បានស្នើបង្កើតការបង្កើតបណ្តាញផ្អែកលើអវកាសនៅឆ្នាំ ២០១៥ ហើយបានធ្វើការជាមួយសមភាគីរបស់ខ្លួននៅប្រទេស BRICS ដទៃទៀតដើម្បីសម្រេចបាន។ បណ្តាញនេះនឹងមានផ្កាយរណបប្រតិបត្តិការជាច្រើនរួមមាន CBERS 4 និង Gaofen 6 របស់ចិនព្រមទាំង Resourcesat-2 របស់ឥណ្ឌា។

យោងតាមសេចក្តីថ្លែងការណ៍នេះបានឲ្យដឹងថា ស្ថានីយ៍ដីនៅទីក្រុង Cuiaba របស់ប្រេស៊ីលShadnagar -Hyderabad របស់ឥណ្ឌា Sany របស់ចិន Hartebeesthoek របស់អាហ្វ្រិកខាងត្បូង និងទីក្រុងម៉ូស្គូនឹងទទួលបានទិន្នន័យពីផ្កាយរណប។ បណ្តាញនេះនឹងក្លាយជាកិច្ចខិតខំប្រឹងប្រែងរួមគ្នាលើកដំបូងដោយបណ្តាប្រទេស BRICS នៃហេដ្ឋារចនាសម្ព័ន្ធដែលមានមូលដ្ឋានលើលំហ។

ផ្កាយរណបចាប់សញ្ញាពីចម្ងាយសំដៅលើផ្កាយរណប ដែលមានភារកិច្ចសង្កេតអង្កេត និងវាស់ស្ទង់វត្ថុនៅលើដី ឬនៅសមុទ្រព្រមទាំងតាមដានអាកាសធាតុ៕