អាមេរិក ៖ យោងតាមការចេញផ្សាយ ពីគេហទំព័រឌៀលីម៉ែល បានប្រាប់ឲ្យដឹងថា ក្រុមហ៊ុនអវកាស SpaceX បញ្ចប់ការផលិតយានអវកាស Crew Dragon ដ៏ជោគជ័យរបស់ខ្លួន បន្ទាប់ពីវាបានបញ្ចប់ ការផលិតយានអវកាសទី៤ ដែលធ្វើឲ្យក្រុមហ៊ុនគ្រប់គ្រង ដោយ Elon Musk ផ្តោតលើរ៉ុក្កែត Starship Mars អាចប្រើឡើងវិញ បានពេញលេញ ។
ឥឡូវនេះមានយានអវកាស Crew Dragons ចំនួន៤ របស់ក្រុមហ៊ុន SpaceX ដែលមានគោលបំណង ជាចម្បងក្នុងការនាំ អវកាសយានិក ទៅកាន់ស្ថានីយ៍អវកាសអន្តរជាតិ ហើយបន្ទាប់មកបញ្ជូនពួកគេមកផែនដីវិញ ។ យានអវកាស Crew Dragon គឺជាយានអវកាសដំបូងគេបានដំណើរការ និងសាងសង់ដោយឯកជន ដើម្បីយកមនុស្ស ទៅកាន់គន្លងតារាវិថី ហើយជាអ្នកដំបូងគេ ដែលនាំអវកាសយានិកទៅកាន់ ISS ពីដីសហរដ្ឋអាមេរិក ចាប់តាំងពីការបញ្ចប់ កម្មវិធី Space Shuttle កាលឆ្នាំ២0១១ ។
ចាប់តាំងពីការបង្ហាញ ខ្លួនលើកដំបូងកាលឆ្នាំ ២0២0 យានអវកាស Crew Dragon បានបញ្ជូនមនុស្ស ទៅកាន់ទីអវកាសចំនួន ៥ ដង រួមទាំងនាវិកពាណិជ្ជកម្ម ពេញលេញដំបូងគេ ដែលធ្វើដំណើរជុំវិញផែនដី។ ការងារនឹងបន្តលើការ កសាងគ្រឿងបន្លាស់ថ្មី និងគ្រឿងបន្លាស់សម្រាប់ យានអវកាស Dragon មានស្រាប់ រួមមានការព្យាយាម ភាពធន់ ការស៊ូទ្រាំ និងសេរីភាព។
នាយកប្រតិបត្តិក្រុមហ៊ុន SpaceX និយាយថា ការផ្លាស់ប្តូរនេះដើម្បីផ្លាស់ប្តូរធនធានទៅក្នុងកម្មវិធីយានអវកាសជំនាន់ក្រោយដែលត្រូវបានគេស្គាល់ថា Starship នឹងរួមបញ្ចូលយានចុះចត លើភពព្រះច័ន្ទ ។ ការបើកដំណើរការដំបូងរបស់ Starship ត្រូវបានពន្យារពេល អស់ជាច្រើនខែ ដោយសារឧបសគ្គក្នុងការអភិវឌ្ឍន៍ ម៉ាស៊ីន និងការត្រួតពិនិត្យបទប្បញ្ញត្តិ ប៉ុន្តែការហោះហើរគន្លងដំបូងគឺដល់កំណត់ នៅឆ្នាំនេះ៕ ដោយ៖លី ភីលីព
