អាមេរិក៖បើយោងតាមក្រុមហ៊ុន Meta-owned បានប្រាប់ឲ្យដឹងថា ឥឡូវនេះកម្មវិធីសារយក្សអាមេរិក WhatsApp នឹងអនុញ្ញាតឲ្យអ្នកប្រើប្រាស់ផ្អាក និងបន្តការថតសំឡេងនៅពាក់កណ្តាលផ្លូវតាមរយៈការធ្វើកំណត់ចំណាំសំឡេងរបស់ខ្លួន នេះបើយោងតាមការចេញផ្សាយពីគេហទំព័រឌៀលីម៉ែល។
ការអាប់ដេតទៅកាន់វេទិកាផ្ញើសារដ៏ពេញនិយមបានកើតឡើងនៅពេលនាយកប្រតិបត្តិលោក Mark Zuckerberg បានបង្ហាញថា អ្នកប្រើប្រាស់ផ្ញើសារជាសំឡេងចំនួន៧ពាន់លានជារៀងរាល់ថ្ងៃ។ យើងទើបតែបានបន្ថែមមុខងារថ្មីៗមួយចំនួន រួមមាន Out of Chat Playback, Pausable Recording និង Draft Preview ដើម្បីធ្វើឲ្យវាកាន់តែងាយស្រួលក្នុងការផ្ញើ និងស្តាប់សាររបស់អ្នក។
លោក Zuckerberg បានប្រកាសថា ខ្ញុំសង្ឃឹមថាអ្នករីករាយនឹងពួកគេ។ ក្រុមហ៊ុនបានបញ្ជាក់ពីលក្ខណៈពិសេសថ្មីចំនួន៦ទាក់ទងនឹងសារជាសំឡេង រួមមានការស្តាប់នៅក្រៅការជជែក ការបង្ហាញរូបភាពនៃសំឡេង និងការមើលជាមុនមុនពេលបង្ហោះ។ ការផ្ញើសារជាសំឡេងសម្រាប់ WhatsApp ត្រូវបានចាប់ផ្តើមដំបូងកាលឆ្នាំ ២0១៣ ដោយមានគោលបំណងផ្តល់ឲ្យមនុស្សនូវវិធីរហ័សក្នុងការទំនាក់ទំនងដោយមិនចាំបាច់វាយអក្សរ។
វាបង្ហាញពីការពេញនិយមភ្លាមៗ ហើយតួលេខនៃការប្រើប្រាស់ចុងក្រោយបំផុតបង្ហាញថា គ្មានសញ្ញានៃការផ្លាស់ប្តូរនោះទេ ហើយសារក៏ត្រូវបានអ៊ិនគ្រីបពីចុងដល់ចប់ផងដែរ។ អ្នកនាំពាក្យ WhatsApp បាននិយាយថា ដោយរក្សាការរចនាសាមញ្ញ យើងបានធ្វើការថត និងផ្ញើសារជាសំឡេងយ៉ាងរហ័ស និងងាយស្រួលដូចការសរសេរអត្ថបទ ៕ដោយ៖លី ភីលីព
