កាតា៖ ក្រុមហ៊ុនបច្ចេកវិទ្យាយក្ស Microsoft បានប្រកាសថា ខ្លួននឹងបង្កើតការងារចំនួន ៣៦,000 នៅក្នុងប្រទេសកាតា ដើម្បីបង្កើនកិច្ចខិតខំប្រឹងប្រែង របស់រដ្ឋឈូងសមុទ្រ ដើម្បីផ្លាស់ទីឆ្ងាយពីការពឹងផ្អែក លើឧស្សាហកម្មប្រេង និងឧស្ម័នរបស់ខ្លួន យោងតាមការចេញផ្សាយ ពីគេហទំព័រជប៉ុនធូដេ។
បង្កើតឡើងដោយមានការគាំទ្រ ពីរដ្ឋាភិបាលកាតា មជ្ឈមណ្ឌលទិន្នន័យពពកថ្មី នឹងក្លាយជាគម្រោងអន្តរជាតិដ៏ធំបំផុតមួយ របស់ក្រុមហ៊ុនអាមេរិក។ អ្នកគ្រប់គ្រងទូទៅរបស់ Microsoft Qatar Lana Khalaf បាននិយាយថា វានឹងជួយឲ្យរដ្ឋឈូងសមុទ្រដ៏តូចមួយនេះ ក្លាយជាមជ្ឈមណ្ឌលឌីជីថលសម្រាប់តំបន់ និងពិភពលោក។
លោកស្រី បាននិយាយនៅក្នុងពិធីសម្ពោធថា យើងកំពុងបន្ថែមទឹកប្រាក់ជាង ១៨ ពាន់លានដុល្លារដល់សេដ្ឋកិច្ចក្នុងរយៈពេល ៥ ឆ្នាំខាងមុខ ហើយយើងក៏នឹងបន្ថែមការងារថ្មី ជាង ៣៦,000កន្លែង រយៈពេល៥ឆ្នាំខាងមុខនេះ។ ចំនួនមជ្ឈមណ្ឌលទិន្នន័យ Cloud កំពុងកើនឡើងនៅជុំវិញពិភពលោក ដើរតួជាឃ្លាំងដ៏ធំពោរពេញ ទៅដោយម៉ាស៊ីនមេ ដែលជួយរក្សាទុក និងដំណើរការព័ត៌មានសម្រាប់ក្រុមហ៊ុន រដ្ឋាភិបាល និងស្ថាប័ននានា។
Amazon, Microsoft និង Google គឺជាប្រតិបត្តិករឈានមុខគេនៃសេវាកម្មទិន្នន័យ Cloud ។ ក្រុមមន្ត្រីបាននិយាយថា ប្រតិបត្តិការរបស់កាតានឹងធ្វើឲ្យប្រទេសនេះ កាន់តែមានភាពគ្រប់គ្រាន់ដោយខ្លួនឯង នៅក្នុងបច្ចេកវិទ្យាព័ត៌មាន និងបង្កើនល្បឿនដំណើរការ។
លោក A.T. Srinivasan ប្រធានផ្នែកព័ត៌មានរបស់ Qatar Airways បាននិយាយនៅក្នុងពិធីនេះ ដោយនិយាយអំពីតម្រូវការនៃការរក្សាទុកទិន្នន័យ ក្នុងស្រុកថា យើងត្រូវតែប្រយ័ត្ននឹងអ្វី ដែលយើងផ្ញើទៅក្រៅប្រទេស។ ប្រទេសកាតាដែលនឹងធ្វើជាម្ចាស់ផ្ទះ ការប្រកួតបាល់ទាត់ពិភពលោកនៅឆ្នាំនេះ កំពុងប្រមូលប្រាក់ចំណេញពីឧស្ម័នធម្មជាតិ និងប្រេងរបស់ខ្លួន ក្នុងរយៈពេលប៉ុន្មានឆ្នាំថ្មីៗនេះ ប៉ុន្តែវិនិយោគយ៉ាងច្រើន នៃការធ្វើពិពិធកម្មសេដ្ឋកិច្ច ដែលជាផ្នែកមួយនៃផែនការជាតិរបស់ខ្លួន សម្រាប់ឆ្នាំ២០៣០៕ ដោយ៖លី ភីលីព
