ញូវយ៉ក៖ អ្នកប្រើប្រាស់ Twitter បានបោះឆ្នោតដោយសំឡេងភាគច្រើន នៅក្នុងការស្ទង់មតិចុងសប្តាហ៍ ដែលបង្ហាញថា លោក Elon Musk គួរចុះចេញពីតំណែង ជានាយកប្រតិបត្តិ នៃក្រុមហ៊ុនប្រព័ន្ធផ្សព្វផ្សាយសង្គមមួយនេះ។
ក្នុងចំណោមការបោះឆ្នោតចំនួន ១៧,៥លានសន្លឹកនៅក្នុងការស្ទង់មតិរយៈពេល ១២ ម៉ោង របស់លោក Musk ដែលបានបិទកាលពីព្រឹកថ្ងៃចន្ទ ៥៧,៥ ភាគរយបានគាំទ្រ ការចាកចេញរបស់លោក ជាមួយនឹង ៤២,៥ ភាគរយបង្ហាញថា លោកគួរតែតំណែងនេះ។
ការផ្លាស់ប្តូរនេះបានធ្វើឡើង បន្ទាប់ពីថ្ងៃដ៏ចម្រូងចម្រាសមួយផ្សេងទៀត សម្រាប់វេទិកាប្រព័ន្ធផ្សព្វផ្សាយសង្គម ដែលមានភាពច្របូកច្របល់ ចាប់តាំងពីលោក Musk បានទិញវានៅក្នុងខែតុលា ហើយបានបញ្ឈប់បុគ្គលិក ជាបន្តបន្ទាប់ នេះបើយោងតាមរបាយការណ៍របស់ The San Francisco Chronicle ។
នៅព្រឹកថ្ងៃអាទិត្យ Twitter បានប្រកាសថា ខ្លួននឹងហាមឃាត់អ្នកប្រើប្រាស់ មិនឲ្យដឹកនាំអ្នកតាមដាន របស់ពួកគេទៅកាន់ទំព័រ Instagram, Facebook ឬ Mastodon របស់ពួកគេ។ ប្រភពបានឲ្យដឹងថាគណនី ដែលបំពានម្តងហើយម្តងទៀត នូវច្បាប់ថ្មីនេះនឹងត្រូវបានផ្អាកជាអចិន្ត្រៃយ៍។
ការវាយប្រហារយ៉ាងខ្លាំងក្លាពីអ្នកប្រើប្រាស់ Twitter បានធ្វើតាម ហើយលោក Musk ក្រោយមកកាលពីថ្ងៃអាទិត្យ បានបង្ហោះសារសុំទោស ដោយលើកឡើងថា “ឆ្ពោះទៅមុខ នឹងមានការបោះឆ្នោត សម្រាប់ការផ្លាស់ប្តូរគោលនយោបាយសំខាន់ៗ” ។ នៅយប់ថ្ងៃអាទិត្យ Twitter បានលុបចោលការបង្ហោះរបស់ខ្លួន និងការជូនដំណឹងគេហទំព័ររបស់ខ្លួន ដោយប្រកាសអំពីគោលការណ៍ថ្មី អំពីការភ្ជាប់ទៅកាន់វេទិកា ប្រព័ន្ធផ្សព្វផ្សាយសង្គមគោលដៅ។
នៅពេលនោះលោក Musk ក៏បានអញ្ជើញអ្នកប្រើប្រាស់ Twitter ឱ្យបោះឆ្នោត “បាទ” ឬ “ទេ” ចំពោះសំណួរថា តើលោកគួរតែចុះចេញពីតំណែងជាប្រធាន Twitter ហើយបានសន្យាថាលោក នឹងធ្វើតាមលទ្ធផល នៃការស្ទង់មតិរយៈពេល ១២ ម៉ោង៕ ប្រែសម្រួល ឈូក បូរ៉ា
