បរទេស៖ ប្រធានប្រតិបត្តិការ និងជាថៅកែ របស់ក្រុមហ៊ុន Twitter ផងលោក Elon Musk កាលពីថ្ងៃម្សិលមិញនេះ បានប្រកាសស្វែងរកប្រធានក្រុមហ៊ុនថ្មីម្នាក់ ដើម្បីមកកាន់តំណែងជំនួសរូបគាត់ បន្ទាប់ពីក្រុមអ្នកប្រើប្រាស់ បាននាំគ្នាបោះឆ្នោត ដើម្បីសុំឲ្យគាត់ចុះចេញ ពីតំណែងនៅ Twitter។
ប្រភពដែលមាននៅជិតស្និទ្ធ ជាមួយនឹងលោក Elon Musk បានបញ្ជាក់ថាពេលនេះ លោកកំពុងស្វែងរកមនុស្ស ដ៏មានសមត្ថភាពម្នាក់ មកជំនួសតំណែង CEO របស់លោកហើយ ពោលគឺតាំងតែពីមុនលទ្ធផល នៃការបោះឆ្នោតបានធ្វើឡើងម្ល៉េះ។
រំលឹកដែរថាតាំងតែពីថ្ងៃអាទិត្យលោក Musk បានបង្ហោះនូវការបោះឆ្នោតមួយ ដែលអនុញ្ញាតិឲ្យអ្នកប្រើប្រាស់ Twitter ក្នុងការជ្រើសយកការគាំទ្រ ឬមិនពេញចិត្ត ចំពោះការកាន់តំណែងរបស់លោក Musk នៅ Twitter ប៉ុន្តែក្រោយប្រកាសលទ្ធផល លោកបានថ្លែងថានៅមិនទាន់មាន អ្នកណាម្នាក់អាចមកជំនួសតំណែងនេះ បាននៅឡើយ។
លោក Musk បានក្លាយទៅជា ប្រធានក្រុមហ៊ុនតាំងតែពីខែតុលា ក្រោយការបញ្ចេញលុយ ដល់ទៅ៤៤ពាន់លានដុល្លារ បញ្ជាទិញយកភាគហ៊ុនមួយចំណែកធំ របស់ក្រុមហ៊ុនពីស្ថាបនិកTwitter និងម្ចាស់ភាគហ៊ុនជាច្រើនទៀត៕ ប្រែសម្រួល៖ស៊ុនលី
