សេអ៊ូល៖ក្រុមហ៊ុន Samsung Electronics បាននិយាយកាលពីថ្ងៃអង្គារថា ប្រាក់ចំណេញប្រតិបត្តិការនៅត្រីមាសទី៤ របស់ខ្លួនបានធ្លាក់ចុះជិត ៧០ ភាគរយ ដែលជាការធ្លាក់ចុះដ៏ធំបំផុតក្នុងរយៈពេលជាង ៨ ឆ្នាំ ដោយសារតែការធ្លាក់ចុះ នៃសេដ្ឋកិច្ចពិភពលោកបានបង្កផលប៉ះពាល់ដល់ការលក់អេឡិចត្រូនិច និងបន្ទះសៀគ្វី យោងតាមការចេញផ្សាយ ពីគេហទំព័រជប៉ុនធូដេ។
ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងបានបន្តថា ប្រាក់ចំណេញប្រតិបត្តិការសម្រាប់រយៈពេលខែតុលា ដល់ខែធ្នូបានធ្លាក់ចុះមកត្រឹម ៤.៣ ពាន់ពាន់លានវ៉ុន (៣.៤ ពាន់លានដុល្លារ)ជាការធ្លាក់ចុះ ៦៩ ភាគរយធៀបនឹងឆ្នាំមុន។
ការធ្លាក់ចុះនេះស្របតាមការប៉ាន់ស្មានរបស់ Samsung បានចេញផ្សាយកាលពីដើមខែនេះ ហើយជាការធ្លាក់ចុះ ដ៏អាក្រក់បំផុតរបស់ក្រុមហ៊ុនក្នុងប្រាក់ចំណេញប្រចាំត្រីមាសចាប់តាំងពីត្រីមាសទី ៣ ឆ្នាំ ២០១៤។
Samsung បាននិយាយក្នុងសេចក្តីថ្លែងការណ៍មួយថា បរិយាកាសធុរកិច្ចបានធ្លាក់ចុះយ៉ាងខ្លាំងនៅត្រីមាសទី ៤ ដោយសារតែតម្រូវការខ្សោយ ចំពេលមានការធ្លាក់ចុះនៃសេដ្ឋកិច្ចពិភពលោក។ ការលក់បានធ្លាក់ចុះប្រាំបីភាគរយមកត្រឹម ៧០.៤៦ ពាន់ពាន់លានវ៉ុនធៀបនឹងរយៈពេលដូចគ្នាកាលពីឆ្នាំមុន។
ក្រុមហ៊ុន Samsung បានលើកឡើងពីតម្រូវការខ្សោយសម្រាប់បន្ទះឈីបអង្គចងចាំ ដោយនិយាយថា វិស័យនេះ បានទទួលរងផលប៉ះពាល់យ៉ាងធ្ងន់ធ្ងរនៅពេលតម្លៃធ្លាក់ចុះ ហើយអតិថិជនបន្តកែសម្រួលសារពើភ័ណ្ឌ ចំពេលមានភាព មិនច្បាស់លាស់កាន់តែជ្រៅក្នុងបរិយាកាសខាងក្រៅ។ ក្រុមហ៊ុននេះគឺជាក្រុមហ៊ុនបុត្រសម្ព័ន្ធរបស់ Samsung Group ដ៏ធំបំផុតនៃក្រុមហ៊ុនគ្រប់គ្រងដោយគ្រួសារដែលគ្រប់គ្រងអាជីវកម្មក្នុងសេដ្ឋកិច្ចធំបំផុតទីបួនរបស់អាស៊ី។
ការធ្លាក់ចុះនៅក្នុងត្រីមាសទី ៤ គឺជាការធ្លាក់ចុះនៃប្រាក់ចំណេញជាប់គ្នាទីពីរសម្រាប់ក្រុមហ៊ុន Samsung ឃើញមានការធ្លាក់ចុះ ៣១ ភាគរយសម្រាប់ប្រាក់ចំណេញប្រតិបត្តិការក្នុងត្រីមាសទី ៣ ពីមួយឆ្នាំទៅមួយឆ្នាំ។ ពេញមួយឆ្នាំ Samsung បានរាយការណ៍ថា ប្រាក់ចំណេញប្រតិបត្តិការ ៤៣.៣៨ ពាន់ពាន់លានវ៉ុន និងប្រាក់ចំណូលប្រចាំឆ្នាំខ្ពស់បំផុតគឺ ៣០២.២៣ ពាន់ពាន់លានវ៉ុន៕
