ញូវយ៉ក ៖ មហាសេដ្ឋីបច្ចេកវិទ្យាលោក Elon Musk បានប្រកាសកាលពីថ្ងៃសៅរ៍ថា Twitter នឹងដាក់កំហិតជាបណ្ដោះអាសន្នចំនួនអ្នកប្រើប្រាស់ Tweets អាចមើល និងទស្សនាក្នុងមួយថ្ងៃ ក្នុងគោលបំណងដើម្បីកាត់បន្ថយការប្រើប្រាស់ទិន្នន័យ គេហទំព័រដោយក្រុមហ៊ុនបញ្ញាសិប្បនិម្មិត យោងតាមការចេញផ្សាយពីគេហទំព័រ VOA ។
វេទិកានេះកំពុងកំណត់គណនីដែលបានផ្ទៀងផ្ទាត់ក្នុងការមើល និងទស្សនាចំនួន ៦,០០០ Tweets ក្នុងមួយថ្ងៃ។ អ្នកប្រើប្រាស់ដែលមិនបានផ្ទៀងផ្ទាត់ ហើយគណនីឥតគិតថ្លៃដែលបង្កើត បានជាអ្នកប្រើប្រាស់ភាគច្រើនត្រូវបានកំណត់ត្រឹមការមើល និងទស្សនា ៦០០ Tweets ក្នុងមួយថ្ងៃ។
គណនីថ្មីមិនបានផ្ទៀងផ្ទាត់នឹងត្រូវបានកំណត់ត្រឹម ៣០០ Tweets ។
លោក Musk បាននិយាយលើ Tweet កាលពីរសៀលថ្ងៃសៅរ៍ថា ការសម្រេចចិត្តនេះត្រូវបានធ្វើឡើងដើម្បីដោះស្រាយកម្រិតខ្លាំងនៃការខ្ជះខ្ជាយទិន្នន័យ និងការរៀបចំប្រព័ន្ធដោយវេទិកាភាគីទី៣។
“Goodbye Twitter” គឺជាប្រធានបទដែលកំពុងពេញនិយមនៅសហរដ្ឋអាមេរិក បន្ទាប់ពីការប្រកាសរបស់លោក Musk ។ លោក Musk បានបន្តថា Twitter នឹងកើនឡើងដល់ ៨,០០០ Tweets ក្នុងមួយថ្ងៃសម្រាប់គណនីដែលបានផ្ទៀងផ្ទាត់ ៨០០ សម្រាប់គណនីមិនបានផ្ទៀងផ្ទាត់ និង ៤០០ សម្រាប់គណនីដែលមិនទាន់បានផ្ទៀងផ្ទាត់ថ្មី។
ម្ចាស់មហាសេដ្ឋីរបស់ Twitter មិនបានផ្តល់ពេលវេលាកំណត់ថា តើវិធានការនេះនឹងត្រូវធ្វើឡើងរយៈពេលប៉ុន្មាននោះទេ។
មួយថ្ងៃមុន លោក Musk បានប្រកាសថា វានឹងមិនអាចទស្សនា tweets នៅលើគេហទំព័រដោយគ្មានគណនីបានទេ។
លោក Musk បានបន្ថែមថា ភាគច្រើន នៃការលួចទិន្នន័យគឺបានមកពីក្រុមហ៊ុនដែលប្រើវាដើម្បីបង្កើតគំរូ AI របស់ពួកគេរហូតដល់ចំណុចដែលវាបង្កបញ្ហាចរាចរណ៍ជាមួយគេហទំព័រ៕ ដោយ៖លី ភីលីព
