ញូវយ៉ក ៖ យោងតាមការចេញផ្សាយ ពីគេហទំព័រជប៉ុនធូដេ បានប្រាប់ឲ្យដឹងថា ភាគហ៊ុនរបស់ក្រុមហ៊ុន បច្ចេកវិទ្យាយក្ស អាមេរិក Apple បានធ្លាក់ចុះយ៉ាងខ្លាំងសម្រាប់វគ្គទី ២ ជាប់ៗគ្នាកាលពីថ្ងៃព្រហស្បតិ៍ បន្ទាប់ពីមានរបាយការណ៍ ពីការរឹតបន្តឹងសំខាន់ៗ របស់ចិនលើទូរស័ព្ទ iPhone នៅការិយាល័យរដ្ឋាភិបាល និងអង្គភាពដែលគាំទ្រដោយរដ្ឋ ។
ភាគហ៊ុនរបស់ក្រុមហ៊ុន ដែលជួញដូរជាសាធារណៈដ៏ធំបំផុត របស់ពិភពលោក បានធ្លាក់ចុះ ២.៨ ភាគរយ នៅត្រឹម ១៧៧.៧៩ ដុល្លារ ក្នុងការជួញដូរពេលព្រឹក ។ ភាគហ៊ុនបានធ្លាក់ចុះ ៣.៦ ភាគរយ កាលពីថ្ងៃពុធ បន្ទាប់ពីរបាយការណ៍ របស់ Wall Street Journal ថា ប្រទេសចិនបានរារាំង ការប្រើប្រាស់ស្មាតហ្វូន របស់ក្រុមហ៊ុន Apple សម្រាប់ទីភ្នាក់ងាររដ្ឋាភិបាលកណ្តាល ។
នោះត្រូវបានតាមដាន កាលពីថ្ងៃព្រហស្បតិ៍ដោយរឿង របស់ Bloomberg News ដែលចិនគ្រោងនឹងពង្រីក ការហាមឃាត់ដល់ទីភ្នាក់ងារ ដែលគាំទ្រដោយរដ្ឋាភិបាល និងក្រុមហ៊ុនរដ្ឋ ដោយពង្រីកឥទ្ធិពល នៃគោលនយោបាយក្នុងសេដ្ឋកិច្ច ដែលមានផែនការកណ្តាល ។
Apple និងមន្ត្រីចិនមិនបានឆ្លើយតប នឹងសំណើសុំការអត្ថាធិប្បាយពី AFP ទេ ។ ការផ្លាស់ប្តូរនេះកើតឡើង ចំពេលដែលភាពតានតឹងកាន់តែខ្លាំងឡើង រវាងទីក្រុងប៉េកាំង និងវ៉ាស៊ីនតោន។ Bloomberg បាននិយាយថា ការចេញផ្សាយ កាលពីសប្តាហ៍មុន នៃស្មាតហ្វូន Huawei ប្រើប្រាស់ប្រព័ន្ធដំណើរ ការផលិតក្នុងប្រទេសចិន ត្រូវបានសាទរ នៅប្រព័ន្ធផ្សព្វផ្សាយ រដ្ឋរបស់ប្រទេសចិនថា នេះជាជ័យជម្នះ បន្ទាប់ពីការដាក់ទណ្ឌកម្ម របស់សហរដ្ឋអាមេរិក ។
ក្រុមហ៊ុន Apple បានរាយការណ៍ថា ប្រាក់ចំណូល ១៥.៨ ពាន់លានដុល្លារ ពីប្រទេសចិនក្នុងត្រីមាស ចុងក្រោយបំផុត គឺជិត ២០ ភាគរយនៃប្រាក់ចំណូលសរុប ។ នាយកប្រតិបត្តិ បានចង្អុលបង្ហាញ ពីការកើនឡើង នៃការលក់នៅប្រទេសចិន ក្នុងរយៈពេល ដែលការលក់ទាំងមូលធ្លាក់ចុះ ។
លោក Patrick O’Hare អ្នកវិភាគ Briefing.com បាននិយាយថា ស្ថានភាពរបស់ក្រុមហ៊ុន Apple មានផលប៉ះពាល់ដល់ក្រុមហ៊ុនបច្ចេកវិទ្យាផ្សេងទៀត។ O’Hare បាននិយាយថា ការព្រួយបារម្ភសម្រាប់ទីផ្សារគឺថា ប្រសិនបើប្រទេសចិនមានចេតនាជ្រើសរើសធ្វើឱ្យអាជីវកម្មពិបាកសម្រាប់ក្រុមហ៊ុនដូចជា
Apple មានទំនាក់ទំនងការងារល្អ និង សំខាន់នៅប្រទេសចិន នោះវាអាចធ្វើដូច្នេះ សម្រាប់ក្រុមហ៊ុនអាមេរិក ជាច្រើនទៀត ដែលធ្វើអាជីវកម្មនៅប្រទេសចិន ។
ប៉ុន្តែលោក Dan Ives អ្នកវិភាគ Wedbush Securities បានប៉ាន់ប្រមាណថា ការហាមប្រាមរបស់រដ្ឋាភិបាលចិន នឹងប៉ះពាល់ដល់ iPhone តិចជាង ៥០០,០០០ គ្រឿង ប្រហែល ៤៥ លានគ្រឿង ដែលគ្រោងនឹងដាក់លក់ក្នុងប្រទេស នៅឆ្នាំក្រោយ ។
លោក Ives បាននិយាយថា យើងជឿថា ទោះបីជាមាន សំលេងលឺខ្លាំងក៏ដោយ Apple បានឃើញការកើនឡើង ចំណែកដ៏ធំក្នុងទីផ្សារស្មាតហ្វូន របស់ប្រទេសចិន ដោយបន្ថែមថា ការកើនឡើង នៃការលក់ផ្តល់ឲ្យ Apple នូវសន្ទុះកើនឡើងនៅខាងមុខ ៕
ដោយ៖លី ភីលីព
