វ៉ាស៊ីនតោន ៖ រដ្ឋបាលរបស់ប្រធានាធិបតីអាមេរិក Joe Biden បានបញ្ចប់ការផ្តល់មូលនិធិជិត ៦.២ ពាន់លានដុល្លារ សម្រាប់ក្រុមហ៊ុនអាមេរិក Micron Technology កាលពីថ្ងៃអង្គារ ដោយបានពង្រឹងកិច្ចព្រមព្រៀងមួយ ក្នុងការជំរុញការផលិតបន្ទះឈីប ក្នុងស្រុក មុនពេលលោក Donald Trump ត្រឡប់ទៅសេតវិមានវិញ យោងតាមការចេញផ្សាយពីគេហទំព័រ Japan Today ។
រដ្ឋបាល Biden បាននឹងកំពុងធ្វើការដើម្បីកិច្ចព្រមព្រៀងភ្លើងខៀវ ជាមួយក្រុមហ៊ុនក្នុងខ្សែសង្វាក់ផ្គត់ផ្គង់បន្ទះឈីបក្នុងរយៈពេលប៉ុន្មានខែថ្មីៗនេះ ដោយសង្ឃឹមថានឹងពង្រឹង វាជាផ្នែកមួយនៃកេរ្តិ៍ដំណែល របស់លោកមុនពេលចាកចេញពីតំណែងនៅខែមករា ។ នៅពេលកិច្ចព្រមព្រៀងត្រូវបានបញ្ចប់ មូលនិធិអាចចាប់ផ្តើមឆ្ពោះទៅរកក្រុមហ៊ុននានា នៅពេលដែលពួកគេឈាន ដល់ចំណុចសំខាន់មួយចំនួន ។
រដ្ឋមន្ត្រីក្រសួងពាណិជ្ជកម្ម លោកស្រី Gina Raimondo បាននិយាយថា ការវិនិយោគរបស់ក្រុមហ៊ុនអាមេរិក Micron ជួយនាំយកការអភិវឌ្ឍន៍ និងផលិតបច្ចេកវិទ្យា អង្គចងចាំកម្រិតខ្ពស់ទៅកាន់ឆ្នេរសមុទ្រអាមេរិក ។ លោកស្រីបានបន្ថែមក្នុងសេចក្តីថ្លែងការណ៍មួយថា នេះមានសារសំខាន់ណាស់ សម្រាប់ការការពារការដឹកនាំ របស់យើងលើបញ្ញាសិប្បនិម្មិត និងការការពារសេដ្ឋកិច្ច និងសន្តិសុខជាតិរបស់យើង។
អាមេរិកកំពុងព្យាយាមកាត់បន្ថយ ការពឹងផ្អែករបស់ខ្លួនលើប្រទេសចិន និងប្រទេសដទៃទៀត សម្រាប់ឧបករណ៍អេឡិចត្រូនិក។ ក្នុងករណីនេះ ទីក្រុងវ៉ាស៊ីនតោនចង់បង្កើត នូវការផ្គត់ផ្គង់បន្ទះឈីបក្នុងស្រុក អាចជឿទុកចិត្តបាន ដដែលអាចចូលទៅក្នុងបច្ចេកវិទ្យាទំនើបៗ ចាប់ពីកុំព្យូទ័រផ្ទាល់ខ្លួន រហូតដល់បញ្ញាសិប្បនិម្មិត រួមទាំងការបើកដំណើរការម៉ូដែល AI ថ្មី។
ការផ្តល់មូលនិធិចុងក្រោយបំផុតគឺស្ថិតនៅក្រោមច្បាប់បន្ទះឈីប និងវិទ្យាសាស្រ្ត ដែលជាច្បាប់ដ៏សំខាន់មួយត្រូវបានអនុម័តក្នុងអំឡុងពេលអាណត្តិរបស់លោក Biden ក្នុងគោលបំណងពង្រឹងឧស្សាហកម្មបន្ទះឈីប របស់ អាមេរិក។
នាយកដ្ឋានពាណិជ្ជកម្មបាននិយាយថា កិច្ចព្រមព្រៀង Micron ជាពិសេសគាំទ្រដល់ផែនការរយៈពេលពីរ ទសវត្សរ៍របស់ក្រុមហ៊ុន រួមទាំងការវិនិយោគចំនួន ១០០ ពាន់លានដុល្លារ នៅទីក្រុងញូវយ៉ក និង ២៥ ពាន់លានដុល្លារ នៅរដ្ឋអៃដាហូ។ នាយកដ្ឋាននេះ បានបន្ថែមថា នេះគួរតែបង្កើតការងារប្រហែល ២០,០០០ និងជួយសហរដ្ឋអាមេរិកបង្កើន ចំណែករបស់ខ្លួនក្នុងការផលិត អង្គចងចាំកម្រិតខ្ពស់។
ក្រៅពីកិច្ចខិតខំប្រឹងប្រែងនៅទីក្រុងញូវយ៉ក និងរដ្ឋអៃដាហូ នាយកដ្ឋានពាណិជ្ជកម្មក៏បានចុះហត្ថលេខាលើកិច្ចព្រមព្រៀងបឋមមួយជាមួយក្រុមហ៊ុន Micron សម្រាប់ការផ្តល់ថវិការហូតដល់ ២៧៥ លានដុល្លារអាមេរិក ដើម្បីពង្រីក និងធ្វើទំនើបកម្មរោងចក្ររបស់ខ្លួននៅរដ្ឋ Virginia ។ នាយកដ្ឋានបានកត់សម្គាល់ថា គោលបំណងគឺដើម្បីគាំទ្រដល់ការផ្គត់ផ្គង់ប្រកបដោយស្ថិរភាព នៃបច្ចេកវិទ្យារបស់ Micron ពាក់ព័ន្ធនឹងបន្ទះឈីបជាគន្លឹះសម្រាប់ទីផ្សាររថយន្ត និងឧស្សាហកម្ម។
ខណៈរដ្ឋាភិបាលសហរដ្ឋអាមេរិកបានបង្ហាញពីជំនួយជាង ៣៦ ពាន់លានដុល្លារតាមរយៈច្បាប់បន្ទះឈីប CHIPS នោះមូលនិធិមួយចំនួននៅតែស្ថិតក្នុងដំណាក់កាលឧស្សាហ៍ព្យាយាម ហើយមិនទាន់អាចបញ្ចេញបានរហូតដល់កិច្ចព្រមព្រៀងត្រូវបានបញ្ចប់៕
