LAS VEGAS ៖ ក្រុមហ៊ុនបច្ចេកវិទ្យាឈានមុខគេរបស់កូរ៉េ នឹងបង្ហាញបរិយាកាសក្នុងផ្ទះនាពេលអនាគត ដែលដំណើរការដោយភ្នាក់ងារបញ្ញាសិប្បនិមិត្ត (AI) ជាមុខងារចម្បងរបស់ពួកគេនៅ CES 2025 នៅ Las Vegas ហើយផ្ទះឆ្លាតវៃដែលដំណើរការដោយ AI ទាំងនេះនឹងផ្តល់ជូន នូវលក្ខណៈពិសេសដូចជាការប្រើប្រាស់ ថាមពលដែលប្រសើរឡើង ការសម្អាតដោយស្វ័យប្រវត្តិ ការត្រួតពិនិត្យសុខភាព និងសូម្បីតែបទពិសោធន៍ សិល្បៈដ៏អស្ចារ្យ នេះយោងតាមការចេញ ផ្សាយពីគេហទំព័រ Korea Times ។
Samsung បាននិយាយកាលពីថ្ងៃចន្ទថា ខ្លួននឹងបង្ហាញដំណោះស្រាយ AI នៅផ្ទះរបស់ខ្លួនក្នុងព្រឹត្តិការណ៍ដែលនឹងប្រព្រឹត្តទៅពីថ្ងៃអង្គារដល់ថ្ងៃសុក្រ។ សម្រាប់ការតាំងពិព័រណ៍នេះ ក្រុមហ៊ុនបច្ចេកវិទ្យាយក្ស បានបង្កើតស្តង់ទំហំ ៣,៣៦៨ ម៉ែត្រការ៉េ នៅមជ្ឈមណ្ឌលសន្និបាត Las Vegas ធ្វើឲ្យវាក្លាយជាស្តង់ដ៏ធំបំផុត ក្នុងចំណោមក្រុមហ៊ុន ដែលចូលរួមក្នុងការតាំងពិព័រណ៍ បច្ចេកវិទ្យាដ៏ធំបំផុតរបស់ពិភពលោក។
ស្តង់នេះនឹងបង្ហាញឧបករណ៍អេឡិចត្រូនិកចុងក្រោយបង្អស់របស់ក្រុមហ៊ុន Samsung រួមបញ្ចូលជាមួយបច្ចេកវិទ្យា Bixby AI ថ្មីបំផុតរបស់ក្រុមហ៊ុន និងវេទិកា SmartThings Internet of Things (IoT) ។ នេះនឹងបង្កើតប្រព័ន្ធអេកូដែលតភ្ជាប់យ៉ាងពេញលេញនៅទូទាំងផ្ទះ។ តាមរយៈនេះ Samsung មានគោលបំណងបង្ហាញបទពិសោធន៍ AI ផ្ទាល់ខ្លួនបន្ថែមទៀត ដែលតម្រូវតាមស្ថានភាពផ្សេងៗគ្នា។
ក្រោមប្រធានបទ “Efficient Home” Samsung នឹងបង្ហាញអំពីបច្ចេកវិទ្យា និងផលិតផលសន្សំ សំចៃថាមពល ដោយមានការត្រួតពិនិត្យ SmartThings និងប្រៀបធៀបប្រសិទ្ធភាព ថាមពលបច្ចុប្បន្ន របស់ផ្ទះទៅនឹងទិន្ន ន័យពីមុន។ ដើម្បីបង្កើនភាពងាយស្រួលដល់អ្នកប្រើប្រាស់ ក្រុមហ៊ុននឹងណែនាំ Bespoke AI Washer & Dryer Combo ដែលបញ្ចប់ការបោកគក់ ដោយមិនចាំបាច់ផ្ទេរសម្លៀកបំពាក់ រវាងម៉ាស៊ីន និង Bespoke AI Steam Robot Vacuum Cleaner មានសមត្ថភាពជូតកម្រាលឥដ្ឋដោយស្វ័យប្រវត្តិ៕
