អាមេរិក៖ ទីភ្នាក់ងារព័ត៌មាន Bloomberg បានរាយការណ៍កាលពីថ្ងៃអង្គារថា ក្រុមហ៊ុន OpenAI ផលិត ChatGPT កំពុងពិភាក្សាជាមួយអ្នកវិនិយោគលើការលក់ភាគហ៊ុនអាចមានតម្លៃ ៥០០ ពាន់លានដុល្លារ ខណៈកិច្ចព្រមព្រៀងនេះនឹងធ្វើឲ្យបុគ្គលិកលក់ភាគហ៊ុន និងអាចធ្វើឲ្យក្រុមហ៊ុននេះក្លាយជាក្រុមហ៊ុនបច្ចេកវិទ្យាឯកជនដ៏មានតម្លៃបំផុតលើពិភពលោក លើសពីក្រុមហ៊ុន SpaceX ដែលមានតម្លៃ ៤០០ ពាន់លានដុល្លាររបស់លោក Elon Musk យោងតាមការចេញផ្សាយពីគេហទំព័រ RT។
កិច្ចពិភាក្សានេះត្រូវបានគេរាយការណ៍ថា វាស្ថិតក្នុងដំណាក់កាលដំបូង ប៉ុន្តែអ្នកវិនិយោគបច្ចុប្បន្នរបស់ OpenAI ទាំងអស់ រួមទាំងក្រុមហ៊ុន Thrive Capital នៅទីក្រុងញូវយ៉កចូលរួមផងដែរ ដោយសារ OpenAI មិនត្រូវបានជួញដូរជាសាធារណៈ ការលក់នឹងធ្វើឲ្យបុគ្គលិកបច្ចុប្បន្ន និងអតីតអាចលក់ភាគហ៊ុនដោយផ្ទាល់ទៅវិនិយោគិន។ ការវាយតម្លៃចុងក្រោយនឹងអាស្រ័យលើតម្រូវការ។
ប្រភពបានអះអាងថា OpenAI កំពុងស្វែងរកការចាប់អារម្មណ៍ពីវិនិយោគិនខ្លាំង ដើម្បីផ្តល់ឲ្យបុគ្គលិកនូវឱកាសក្នុងការដកប្រាក់ និងទទួលបានអត្ថប្រយោជន៍ពីការរីកចម្រើនរបស់ក្រុមហ៊ុន។ របាយការណ៍នេះកើតឡើងបន្ទាប់ពីការផ្តល់មូលនិធិចំនួន ៤០ ពាន់លានដុល្លាររបស់ OpenAI នាពេលថ្មីៗនេះដែលដឹកនាំដោយក្រុមហ៊ុម SoftBank របស់ប្រទេសជប៉ុនដែលផ្តល់តម្លៃដល់ក្រុមហ៊ុនចំនួន ៣០០ ពាន់លានដុល្លារ។
កាលពីសប្តាហ៍មុន ក្រុមហ៊ុនបានរៃអង្គាសប្រាក់បានចំនួន ៨.៣ ពាន់លានដុល្លារពីជុំនោះ ជាមួយនឹងតម្រូវការត្រូវបានគេរាយការណ៍ថា ខ្ពស់ជាងចំនួនភាគហ៊ុនដែលមានចំនួន ៥ ដង។ ចំណាប់អារម្មណ៍របស់វិនិយោគិនមានន័យថាការលក់ភាគហ៊ុនថ្មីអាចមានទំហំធំជាង ១.៥ ពាន់លានដុល្លារដែល OpenAI បានធ្វើកាលពីចុងឆ្នាំមុន។
ការលក់ដែលអាចធ្វើទៅបានកើតឡើងក្នុងអំឡុងពេលមានការរីកចម្រើន AI ដោយអ្នកវិនិយោគបានចាក់លុយចូលទៅក្នុងក្រុមហ៊ុនឈានមុខគេ។ ឯកសារសាធារណៈបង្ហាញ Meta Microsoft Amazon និង Alphabet បានចំណាយរាប់សិបពាន់លានលើ AI នៅឆ្នាំនេះ ហើយគ្រោងនឹងវិនិយោគជាង ៤០០ ពាន់លានដុល្លារនៅឆ្នាំ២០២៦។
អ្នកជំនាញនិយាយថា ការចំណាយអាចកើនឡើងខ្ពស់ក្រោម ‘Big Beautiful Bill’ របស់ប្រធានាធិបតីអាមេរិក លោក Donald Trump ដែលផ្តល់ការបន្ធូរបន្ថយពន្ធសម្រាប់ក្រុមហ៊ុនដែលវិនិយោគលើមុខ ដោយដោះលែងសាច់ប្រាក់សម្រាប់គម្រោង AI ៕
