ញូវយ៉ក៖ ក្រុមហ៊ុនផលិតរថយន្តយក្សជប៉ុន Toyota Motor Corp បាននិយាយកាលពីថ្ងៃអង្គារថា ខ្លួននឹងវិនិយោគទឹកប្រាក់សរុបចំនួន ៩១២ លានដុល្លារក្នុងរោងចក្រចំនួន ៥ កន្លែងនៅសហរដ្ឋអាមេរិក ដើម្បីបំពេញតម្រូវការការផលិតប្រភេទរថយន្តកូនកាត់ដែលកំពុងកើនឡើងនាពេលបច្ចុប្បន្ននេះ យោងតាមការចេញផ្សាយពីគេហទំព័រ Japan Today បានប្រាប់ឲ្យដឹងថា។
ការផ្លាស់ប្តូរនេះគឺជាផ្នែកមួយនៃផែនការរបស់ក្រុមហ៊ុនដោយបានប្រកាសកាលពីសប្តាហ៍មុន ដើម្បីវិនិយោគបន្ថែមរហូតដល់ ១០ ពាន់លានដុល្លារនៅអាមេរិកក្នុងរយៈពេល ៥ ឆ្នាំខាងមុខ ដោយរោងចក្រនៅរដ្ឋ Mississippi រដ្ឋ West Virginia រដ្ឋ Kentucky រដ្ឋ Tennessee និងរដ្ឋ Missouri នឹងត្រូវស្ថិតនៅក្រោមការវិនិយោគនេះ។
ក្រុមហ៊ុន Toyota ជាក្រុមហ៊ុនផលិតរថយន្តធំជាងគេបំផុតរបស់ពិភពលោក តាមបរិមាណ បាននិយាយថា ខ្លួននឹងផលិតរថយន្តកូនកាត់ជំនាន់ដំបូងរបស់ខ្លួននៃរថយន្ត Corolla នៅរដ្ឋ Mississippi និងមានគោលបំណងពង្រឹងសមត្ថភាពផលិតរបស់ខ្លួនសម្រាប់ម៉ាស៊ីន និងគ្រឿងបន្លាស់សម្រាប់រថយន្តកូនកាត់។ ក្រុមហ៊ុននេះមានគម្រោងចាប់ផ្តើមដំណើរការខ្សែសង្វាក់ផលិតកម្មថ្មីជាដំណាក់កាលចាប់ពីឆ្នាំ ២០២៧ ហើយត្រូវបានគេរំពឹងថានឹងជួលបុគ្គលិកថ្មីប្រហែល ២៥០ នាក់។
យោងតាមក្រុមហ៊ុនផលិតរថយន្តបានបន្ថែមថា ប្រហែលពាក់កណ្តាលនៃរថយន្តដែលលក់នៅសហរដ្ឋអាមេរិកត្រូវបានផ្គុំក្នុងប្រទេស ខណៈ ៧៦ ភាគរយនៃរថយន្តដែលផលិតនៅទូទាំងអាមេរិកខាងជើង រួមទាំងប្រទេសកាណាដា និងម៉ិកស៊ិក ត្រូវបានផលិតសម្រាប់លក់នៅអាមេរិក។ កាលពីសប្តាហ៍មុន ក្រុមហ៊ុន Toyota បានបើករោងចក្រនៅក្រៅប្រទេសដំបូងរបស់ខ្លួននៅរដ្ឋ North Carolina ដែលឧទ្ទិសដល់ការផលិតអាគុយលីចូម-អ៊ីយ៉ុងសម្រាប់រថយន្តកូនកាត់ រថយន្តអគ្គិសនី និងរថយន្តកូនកាត់ដោត។
ទីក្រុងវ៉ាស៊ីនតោនបានដាក់ពន្ធ ១៥ ភាគរយលើការនាំចូលរថយន្តរបស់ជប៉ុនកាលខែកញ្ញា ដែលធ្លាក់ចុះពី ២៧.៥ ភាគរយដែលកំណត់ដំបូងដោយប្រធានាធិបតីអាមេរិក លោក Donald Trump។ ទោះជាយ៉ាងណាក៏ដោយ តួលេខនេះនៅតែខ្ពស់ជាងអត្រា ២.៥ ភាគរយបានអនុវត្តមុនខែមេសាដល់ទៅ ៦ ដង៕
