បរទេស៖ ក្រសួងការបរទេសសហរដ្ឋអាមេរិក តាមសេចក្តីរាយការណ៍ បាននិយាយនៅថ្ងៃសុក្រសប្ដាហ៍នេះថា អនុរដ្ឋមន្ត្រីការបរទេសអាមេរិក លោកស្រី Wendy Sherman នឹងដឹកនាំគណៈប្រតិភូសហរដ្ឋអាមេរិក ក្នុងកិច្ចពិភាក្សាគ្រប់គ្រងអាវុធនុយក្លេអ៊ែ ជាមួយប្រទេសរុស្ស៊ី នៅថ្ងៃទី២៨ ខែកក្កដា នៅក្នុងទីក្រុងហ្សឺណែវ។
នៅក្នុងជំនួបលំដាប់កំពូលដំបូង រវាងមហាអំណាចនុយក្លេអ៊ែទាំងពីរ ចាប់តាំងពីលោកប្រធានាធិបតី ចូ បៃដិន កាន់អំណាចមកនោះ លោកនិងប្រធានាធិបតីរុស្ស៊ី លោក វ្លាឌីមៀរ ពូទីន បានព្រមព្រៀងគ្នាបន្តកិច្ចពិភាក្សា ដែលគេស្គាល់ថា កិច្ចពិភាក្សាស្ថិរភាពយុទ្ធសាស្ត្រអាមេរិក-រុស្ស៊ី ក្នុងគោលបំណងកាត់បន្ថយហានិភ័យនៃសង្គ្រាមនុយក្លេអ៊ែ។
តាមសេចក្តីរាយការណ៍ លោកស្រី Wendy Sherman នឹងធ្វើដំណើរទៅទីក្រុងហ្សឺណែវ នៅថ្ងៃពុធសប្ដាហ៍ក្រោយ សម្រាប់ជំនួបដំបូងនៃការបន្តកិច្ចពិភាក្សាគ្នានោះ ក្រោយជំនួបនានានៅក្នុងប្រទេសចិន នាថ្ងៃអាទិត្យនិងថ្ងៃចន្ទ ក្រោយការឈប់ចូលក្នុងប្រទេសអូម៉ង់។
នៅក្នុងសេចក្តីថ្លែងការណ៍មួយ ក្រសួងការបរទេសអាមេរិក បាននិយាយប្រាប់យ៉ាងដូច្នេះថា “ជំនួបនេះគឺត្រូវបានធ្វើឡើង ក្រោយការប្តេជ្ញាមួយរវាងលោកប្រធានាធិបតី បៃដិន និងលោកប្រធានាធិបតីរុស្ស៊ី ពូទីន ឲ្យមានកិច្ចពិភាក្សាប្រកបដោយចេតនារឹងមាំ រវាងប្រទេសយើងទាំងពីឬ ដែលនឹងចាក់គ្រឹះសម្រាប់វិធានការគ្រប់គ្រង និងកាត់បន្ថយអាវុធនាពេលអនាគត”៕
ប្រែសម្រួល៖ប៉ាង កុង
