តើនេះជាយុទ្ធសាស្រ្តរបស់ Vinfast ដើម្បីឱ្យឃើញថា មានអ្នកប្រើរថយន្តខ្លួនច្រើន ឬយ៉ាងណា ក្នុងខណៈដែលក្រុមហ៊ុនវៀតណាមនេះ កំពុងតស៊ូរក្សាវត្តមានខ្លួននៅលើទឹកដីសហរដ្ឋអាមេរិក ចាប់តាំងពីបោះជំហានចូលកាលពីដើមឆ្នាំ២០២៣នេះ។
របាយការណ៍របស់គណៈកម្មការមូលបត្រអាមេរិក បានលាតត្រដាងថា ក្នុងចំណោមរថយន្តអគ្គិសនីចំនួន ១១៣០០គ្រឿង ដែលលក់ដោយក្រុមហ៊ុន Vinfast នៅឆមាសទី១ ឆ្នាំ២០២៣ ក្នុងនោះគឺមានជាង ៧ពាន់គ្រឿងហើយ ត្រូវបានទិញដោយក្រុមហ៊ុនតាក់ស៊ី Green and Smart Mobility។ ក្រុមហ៊ុនវៀតណាមទាំងពីរនេះ គឺស្ថិតក្រោមការគ្រប់គ្រងរបស់ម្ចាស់តែមួយ គឺក្រុមហ៊ុន Vingroup។
គួរដឹងថា Vinfast បានសាងប្រវត្តិសាស្រ្តដែលបានធ្វើឱ្យតម្លៃភាគហ៊ុនរបស់ខ្លួនឡើងយ៉ាងលឿនរហ័ស។ តម្លៃរបស់ក្រុមហ៊ុនបានកើនដល់ ២០០ពាន់លានដុល្លារក្នុងខែកញ្ញានេះ ដែលបានធ្វើឱ្យ Vinfast ជាប់ក្នុងចំណោមក្រុមហ៊ុនរថយន្តដែលមានតម្លៃថ្លៃបំផុត។
កាលពីឆ្នាំមុន Vinfast លក់រថយន្តបានចំនួន ២៤ ០០០គ្រឿងនៅទូទាំងពិភពលោក ហើយនៅឆ្នាំនេះខ្លួនរំពឹងថានឹងលក់បានដល់ចំនួន ៥ម៉ឺនគ្រឿង។
កាលពីថ្ងៃទី១២ ខែកញ្ញា ក្រុមហ៊ុន Vinfast បានប្រកាសផែនការរបស់ខ្លួនក្នុងការពង្រីកទីផ្សារចំនួន៧បន្ថែមទៀតក្នុងតំបន់អាស៊ី ដោយរួមមានទាំងប្រទេសឥណ្ឌូណេស៊ីផងដែរ ពោលគឺមានគោលដៅលក់រថយន្តអគ្គិសនី និងគ្រោងបង្កើតរោងចក្រផលិតរថយន្ត និងអាគុយនៅប្រទេសអាស៊ានមួយនេះតែម្តង៕
ប្រភព៖ sabay
