ខេត្តស្វាយរៀង ៖ លោក សរ សិទ្ធិ អនុប្រធានទី២ សហព័ន្ធនាថ្ងៃទី៦ ខែធ្នូ ឆ្នាំ២០២៤ ជួបសំណេះសំណាល និងប្រគល់ប្រាក់រង្វាន់ លើកទឹកចិត្ត របស់អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអ៊ីងកម្ពុជា និងលោកស្រី កែ សួនសុភី ស សុខា ជូនដល់ប្រតិភូ គ្រូបង្វឹក កីឡាករ-កីឡាការិនី ក្រុមជម្រើសជាតិ កីឡាទូកនាគ ទូកកានូ-កាយ៉ាក់ និងទូករ៉ូអ៊ីងដែលដណ្តើម បានមេដាយពីការ ប្រកួតអន្តរជាតិ ឆ្នាំ២០២៤ ។
លោក គង់ សុភាព គ្រូជំនួយបាននិយាយថា ដោយមានការអនុញ្ញាត ជាគោលការណ៍ ពីក្រសួងអប់រំ យុវជន និងកីឡា និងមានអនុញ្ញាត ជាគោលការណ៍ ពីអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន សហព័ន្ធកីឡាទូកកានូ និងរ៉ូអ៊ីងកម្ពុជា ក្នុងនោះសហព័ន្ធ បានបញ្ជូនប្រតិភូ គ្រូបង្វឹក កីឡាករ កីឡាការិនី ចូលរួមព្រឹត្តិការណ៍ ប្រកួតកីឡាទូកអន្តរជាតិ ក្នុងឆ្នាំ២០២៤ ដូចខាងក្រោម ៖
ថ្ងៃទី០៨ ខែមិថុនា ឆ្នាំ២០២៤ សហព័ន្ធ បានបញ្ជូនប្រតិភូ គ្រូបង្វឹក កីឡាករ-កីឡាការិនីចំនួន ២៨នាក់ ទៅចូលរួមការ ប្រកួតកីឡាទូកនាគអន្តរជាតិ 2024 SJM Macao International Dragon Boat Races ចាប់ពីថ្ងៃទី០៨ ដល់ថ្ងៃទី ១០ ខែមិថុនា ឆ្នាំ២០២៤ នៅចិនម៉ាកាវ ជាលទ្ធផល ក្រុមទូកនាគកម្ពុជា ជាប់ចំណាត់ថ្នាក់លេខ៦ ក្នុងចំណោម ៣២ក្រុម គឺពុំទទួលបាន មេដាយនោះទេ ។ថ្ងៃទី២៤ ខែមិថុនា ឆ្នាំ២០២៤ សហព័ន្ធ បានបញ្ជូនប្រតិភូ គ្រូបង្វឹក កីឡាករ ចំនួន០៤នាក់ ទៅចូលរួមប្រកួតកីឡាទូករ៉ូអ៊ីង ជ្រើសរើសជើងឯកអាស៊ីអាគ្នេយ៍ ចាប់ថ្ងៃទី២៤ ដល់ថ្ងៃទី៣០ ខែមិថុនា ឆ្នាំ២០២៤ នៅទីក្រុងហៃផុង ប្រទេសវៀតណាម ជាលទ្ធផល ក្រុមទូករ៉ូអ៊ីងកម្ពុជា ដណ្តើមបាន មេដាយសំរឹទ្ធ ០១គ្រឿង ។
លោកគ្រូជំនួយបានបន្តថា ថ្ងៃទី២៧ ខែមិថុនា ឆ្នាំ២០២៤ សហព័ន្ធ បានបញ្ជូនប្រតិភូ គ្រូបង្វឹក កីឡាករ ចំនួន១៥នាក់ ទៅចូលរួមការប្រកួតកីឡាទូកនាគអន្តរជាតិ 2024 International Dragon Boat Races ចាប់ថ្ងៃទី២៨ ដល់ថ្ងៃទី៣០ ខែមិថុនា ឆ្នាំ២០២៤ នៅរដ្ឋ Altai Krai ប្រទេសរុស្ស៊ី ជាលទ្ធផលក្រុមទូកនាគកម្ពុជា
ដណ្តើមបានមេដាយ មាស ០១គ្រឿង និងសំរឹទ្ធ ០២គ្រឿង។ ថ្ងៃទី០១ ខែកក្កដា ឆ្នាំ២០២៤ សហព័ន្ធ បានបញ្ជូនប្រតិភូ គ្រូបង្វឹក កីឡាករ ចំនួន០៥នាក់ ទៅចូលរួមប្រកួតកីឡាទូកកានូស្ព្រីនជ្រើសរើសជើងឯកអាស៊ីអាគ្នេយ៍ ចាប់ថ្ងៃទី១ ដល់ថ្ងៃទី៨ ខែកក្កដា ឆ្នាំ២០២៤ នៅទីក្រុងហៃផុង ប្រទេសវៀតណាម ជាលទ្ធផលក្រុមទូកកានូកម្ពុជា ដណ្តើមបាន មេដាយសំរឹទ្ធ ០២គ្រឿង ។
៥-ថ្ងៃទី២៨ ខែតុលា ឆ្នាំ២០២៤ សហព័ន្ធ បានបញ្ជូនប្រតិភូ គ្រូបង្វឹក កីឡាករចំនួន១៧នាក់ ទៅចូលរួមប្រកួត កីឡាកីឡាទូកនាគជ្រើសរើសជើងឯកពិភពលោក ឆ្នាំ២០២៤ ចាប់ថ្ងៃទី២៩ ខែតុលា ដល់ថ្ងៃទី៣ ខែវិច្ឆិកា ឆ្នាំ២០២៤ នៅទីក្រុង Puerto Princesa ប្រទេសហ្វីលីពីន ជាលទ្ធផល ក្រុមទូកនាគកម្ពុជា ជាប់ចំណាត់ថ្នាក់លេខ៩ ក្នុងចំណោម ២៧ប្រទេស គឺពុំទទួលបានមេដាយនោះទេប៉ុន្តែក្រុមទូកនាគកម្ពុជា បានជាប់ក្នុងវគ្គជម្រុះ World Games ឆ្នាំ២០២៥ នៅប្រទេសចិន ។
សូមគោរពបញ្ជាក់ជូនថា៖ឆ្នាំ២០២៤ នេះ សហព័ន្ធ បានបញ្ជូន ប្រតិភូ គ្រូបង្វឹក កីឡាករ កីឡាការិនី ចូលរួមប្រកួតក្នុងព្រឹត្តិការណ៍អន្តរជាតិ ចំនួន០៥លើក ក្នុងនោះ ក្រុមកីឡាទូកកម្ពុជា ដណ្តើមបានមេដាយសរុប ចំនួន ០៦គ្រឿង រួមមាន៖ មេដាយមាស ០១គ្រឿង និងសំរឹទ្ធ ចំនួន ៥គ្រឿង៕
