សិង្ហបុរី៖យោងតាមការចេញ ផ្សាយពីគេហទំព័រ VN Express បានប្រាប់ឲ្យដឹងថា អាជ្ញាធរសិង្ហបុរីបានប្រមូល ផលិតផលម្សៅទឹកដោះគោទារក Nestlé និងDumex មកវិញចំនួនពីរមុខ សង្ស័យថា មានផ្ទុកសារធាតុ Cereulide ដោយចាប់ផ្តើមការ ស៊ើបអង្កេត ខណៈពេលដែលជំរុញឲ្យឪពុកម្តាយឈប់ប្រើប្រាស់ផលិតផល និងស្វែងរកដំបូន្មាន ពីគ្រូពេទ្យ ប្រសិនបើរោគសញ្ញាលេចឡើង។
ទីភ្នាក់ងារចំណីអាហារសិង្ហបុរី (SFA) បានប្រមូលផលិតផលម្សៅទឹកដោះគោទារក រួមមាន Nestlé NAN HA 1 SupremePro 800g លេខបាច់ 52340017C3 ផលិតនៅប្រទេសស្វីស និង Dumex Dulac 1 800g លេខបាច់ 101570778C ផលិតនៅប្រទេសថៃ ដោយសារតែសង្ស័យថា មានផ្ទុកសារធាតុ Cereulide ។
ទីភ្នាក់ងារចំណីអាហារសិង្ហបុរី បាននិយាយថា ការប្រមូលផលិតផលមកវិញនេះត្រូវបានប្រកាសដោយ SFA នៅលើគេហទំព័ររបស់ខ្លួន នៅថ្ងៃសៅរ៍ បន្ទាប់ពីផលិតផល Nestlé NAN ជាច្រើនសម្រាប់ទារកត្រូវបាន ដកចេញពីធ្នើរលក់រាយនៅថ្ងៃទី ៨ ខែមករា។ ផលិតផលទាំងនេះអាចបានប្រើគ្រឿងផ្សំឆៅដូចគ្នាដែលផ្គត់ផ្គង់ដោយប្រភពដូចគ្នាប្រើក្នុងផលិតផលម្សៅទឹកដោះគោទារកដែលពាក់ព័ន្ធពីមុន។
សេចក្តីថ្លែងការណ៍មួយចេញផ្សាយរួមគ្នាជាមួយទីភ្នាក់ងារជំងឺឆ្លង (CDA) អាជ្ញាធរបាននិយាយថា ប្រទេសសិង្ហបុរីបានកត់ត្រាករណីជំងឺមួយដែលអាចជាប់ទាក់ទងនឹងការប៉ះពាល់នឹងជាតិពុល Cereulide បន្ទាប់ពីទទួលទានទឹកដោះគោ។ ទារកមានរោគសញ្ញាស្រាលៗ ហើយបានជាសះស្បើយឡើងវិញ។ ទោះជាយ៉ាងណាក៏ដោយ បច្ចុប្បន្ននេះមិនទាន់មានការធ្វើតេស្តមន្ទីរពិសោធន៍គ្លីនិកច្បាស់លាស់ដើម្បីបញ្ជាក់ពីការពុល Cereulide នៅឡើយទេ។
CDA កំពុងធ្វើការយ៉ាងជិតស្និទ្ធជាមួយ SFA ហើយកំពុងធ្វើការឃ្លាំមើល ជាមួយអ្នកអនុវត្តវេជ្ជសាស្ត្រ ដើម្បីតាមដានករណីដែលអាចកើតមាននៃការពុល Cereulide ចំពោះកុមារ។
SFA បាននិយាយថា បាច់ទឹកដោះគោ នាំចូលដែលរងផលប៉ះ ពាល់មានចំនួនតិចជាង ៥ ភាគរយនៃការផ្គត់ផ្គង់ ម្សៅទឹកដោះគោ ទារកសរុបរបស់ប្រទេសសិង្ហបុរី ហើយថា ខ្លួននឹងបន្តចូលរួមជាមួយអ្នកនាំចូល និងអ្នកផលិតដើម្បី តាមដានស្ថានភាពយ៉ាងដិតដល់៕
