មហាសេដ្ឋី​ជប៉ុន ​លា​ឈប់​ពី​ការងារ ​ត្រៀម​ខ្លួន​ហោះ​ ទៅ​ឋាន​ព្រះ​ចន្ទ​

​លោក Yusaku Maezawa អ្នក​បណ្ដាក់​ទុន​ដ៏​ធំ​មួយ ​ក្នុង​​ប្រព័ន្ធ​រ៉ុកកែត​ជំនាន់​ចុង​ក្រោយ ​របស់​ក្រុមហ៊ុន SpaceX គ្រោង​នឹង​លក់​ភាគ​ហ៊ុន​ ៣០% ក្នុង​ក្រុមហ៊ុន​លក់​ទំនិញ​អនឡាញ​របស់​ខ្លួន​ឈ្មោះ Zozo ទៅ​ឲ្យ​ក្រុមហ៊ុន Yahoo Japan ។

• 

លោក Yusaku Maezawa
​ការ​ចុះ​ផ្សាយ​របស់ Forbes បាន​និយាយ​ថា​ ការ​ចាក​ចេញ​របស់​លោក Maezawa គឺ​ជា​ហេតុផល​​ផ្ទាល់​ខ្លួន​ច្រើន​ជាង គឺ​ក្នុង​គោល​បំណង​ត្រៀម​ខ្លួន​សម្រាប់​ការ​ហោះ​ទៅ​ឋាន​ព្រះចន្ទ​នៅ​ឆ្នាំ ២០២៣ នៅ​ក្នុង​រ៉ុកកែត Starship របស់ SpaceX ។

​លោក Maezawa នឹង​លា​លែង​តំណែង​ ពី​នាយក​ប្រតិបត្តិ​ក្រុមហ៊ុន Zozo ជា​ថ្នូរ​នឹង​​​​​ទ្រព្យ​ ៣,៧ ពាន់​លាន​ដុល្លារ ដែល​លោក​នឹង ​ទទួល​បាន​សាច់​ប្រាក់​សុទ្ធ ២,៣ ពាន់​លាន​ដុល្លារ និង​អាច​រក្សា​ទុក​ភាគ​ហ៊ុន ៦% ក្នុង​ក្រុមហ៊ុន ​ដែល​ខ្លួន​បង្កើត ។ លោក Maezawa បាន​និយាយ​អំពី​ការ ​ជួញដូរ​នេះ នៅ​ក្នុង​សន្និសីទ​ពោរពេញ​ដោយ​មនោសញ្ចេតនា​​មួយ​​មាន​រយៈ ២ ម៉ោង ដែល​ធ្វើ​ឡើង​កាល​ពី​សប្ដាហ៍​កន្លង​ទៅ ។

​​លោក​មហាសេដ្ឋី​រូប​នេះ បាន​ប្រកាស​អំពី​គោល​បំណង ​​ហោះ​ជុំវិញ ​ឋាន​ព្រះចន្ទ​កាល​ពី​អំឡុង​ខែ​កញ្ញា​ ឆ្នាំ ២០១៨ ក្នុង​​ពេល​​ដែល​លោក Elon Musk នាយក​ប្រតិបត្តិនិង​ស្ថាបនិក​របស់ SpaceX បាន​ធ្វើ​បទ​បង្ហាញ ​អំពី​ប្រព័ន្ធ​បាញ់​បង្ហោះ​ថ្មី ។

លោក Yusaku Maezawa ពេលជួបផ្ទាល់នឹងលោក Elon Musk
​លោក Maezawa គ្រោង​នឹង​ជ្រើស​រើស​នាវិក​ ​ធ្វើ​ដំណើរ​ទៅ​ឋាន​ព្រះចន្ទ ​ជា​មួយ​ខ្លួន​ដោយ​ផ្ទាល់​ដៃ ដែល​ក្នុង​នោះ​លោក​ចង់​រើស​យក​វិចិត្រករ, តន្ត្រីករ និង​អ្នក​ថត​ភាព​យន្ត រួម​ទាំង​សិល្បករ​ដទៃ​ទៀត និង អវកាសយានិក​ប៉ុន្មាន ​នាក់​ផង​ដែរ។

​លោក Elon ​ធ្លាប់​បាន​និយាយ​ថា​ បេសកម្ម​នេះ​ត្រូវ​ចំណាយ​ពី ២ ទៅ ១០ ពាន់​លាន​ដុល្លារ ក្នុង​ការ​អភិវឌ្ឍ​ Starship ឲ្យ​មាន​ដំណើរ​ការ​បាន៕