តារាសម្ដែងល្បីឈ្មោះក្នុងវិស័យភាពយន្ដប្រចាំប្រទេសថៃនាង Pinky Savika កំពុងត្រូវឃុំខ្លួននៅវិទ្យាស្ថាន Central Institute for Women’s Correction។ ស្ថានភាពនាងពេលនេះកាន់តែយ៉ាប់យឺនមាន ភាពតានតឹងផ្លូវចិត្តច្រើន ប៉ុន្តែម្ដាយ និងប្អូនរបស់នាងនៅមានស្មារតីរឹងពឹង។
យោងតាមមិត្តជិតស្និទ្ធនាង Kwang Farung Yuthithum បានឲ្យដឹងថា Pinky Savika Chaiyadej អស់កម្លាំង តានតឹង និងយំនៅក្នុងបន្ទប់ឃុំឃាំង។ Kwang Farung Yuthithum បាននិយាយថា Pinky Savika Chaiyadej បានផុតកំណត់រយៈពេលដាក់ឱ្យនៅដាច់ពីគេ ហើយបានផ្លាស់ទៅពន្ធនាគារឃុំខ្លួន។ នៅក្នុងការសន្ទនាជាមួយ Kwang Farung Yuthithum Pinky Savika Chaiyadej បានសារភាពថានាងមានការធ្លាក់ទឹកចិត្ត ស្ត្រេស និងអស់កម្លាំងដោយសារតែអ្វីដែលបានកើតឡើង។
សារព័ត៌មាន Thairath បានចុះផ្សាយថា តារាសម្ដែង Pinky Savika Chaiyadej បានកាត់សក់តាមច្បាប់ពន្ធនាគារ។ រហូតមកដល់ពេលនេះ Pinky Savika ធ្វើសមាធិ ហាត់យូហ្គា និងអានសៀវភៅដើម្បីជៀសវាងភាពតានតឹង និងកើតជំងឺបាក់ទឹកចិត្ត ធ្វើយ៉ាងណាឱ្យស្ថានភាពផ្លូវចិត្តប្រសើរឡើងវិញ។
រម្លឹកផងដែរថា Pinky Savika រួមជាមួយម្តាយ ប្អូនប្រុស និងមនុស្សជាច្រើននាក់ទៀត ត្រូវបានចាប់ខ្លួនកាលពីថ្ងៃទី១៨ ខែសីហា ពីបទឆបោក។ នៅពេលនោះការិយាល័យព្រះរាជអាជ្ញាសម្រាប់សំណុំរឿងពិសេសទី៤ បានប្ដឹងនាង Pinky Savika ដោយសារតែចំនួនជនរងគ្រោះក្នុងសំណុំរឿងក្លែងបន្លំមានដល់ទៅ ៩៨២៤ នាក់ ហើយចំនួននេះមានចំនួនជិត ២,៥ ពាន់លានបាត ប្រហែល ៧០ លានដុល្លារអាមេរិក តុលាការថៃបានចាត់ទុកករណីនេះថាជាករណីធ្ងន់ធ្ងរ៕
