បរទេស៖ ប្រទេសវៀតណាមមានយោធាដែលមានឥទ្ធិពលបំផុតទី ២៣ នៅលើពិភពលោក។ នេះបើយោងតាមចំណាត់ថ្នាក់របស់គេហទំព័រ Global Firepower របស់សហរដ្ឋអាមេរិក។
យោងតាមសារព័ត៌មាន VN Express ចេញផ្សាយកាលពីថ្ងៃទី២៩ ខែតុលា ឆ្នាំ២០១៩ បានឱ្យដឹងដោយយោងតាមតារាងចំណាត់ថ្នាក់កម្លាំងយោធាឆ្នាំ ២០១៩ គឺប្រទេសនេះបានធ្លាក់ចុះចំនួន ៣ថ្នាក់ ពីឆ្នាំមុន ប៉ុន្តែនៅតែស្ថិតក្នុងលំដាប់ទី ២ នៅអាស៊ីអាគ្នេយ៍ បន្ទាប់ពីប្រទេសឥណ្ឌូនេស៊ី។
Global Firepowerគឺជាគេហទំព័រយោធាមិនមែនរដ្ឋាភិបាល ដែលមានមូលដ្ឋាននៅសហរដ្ឋអាមេរិក ដែលវាយតម្លៃអំណាចយោធានៃប្រទេសនានានៅជុំវិញពិភពលោក។
សន្ទស្សន៍វាស់កម្លាំងយោធារបស់ប្រទេសចំនួន ១៣៧ ប្រទេស និងដែនដីជុំវិញពិភពលោកដោយផ្អែកលើ ៥៥ ប៉ារ៉ាម៉ែត្រ រួមមានធនធានយោធា ភាពចម្រុះនៃប្រព័ន្ធអាវុធ ធនធានធម្មជាតិ ភូមិសាស្ត្រ ហិរញ្ញវត្ថុ និងកម្លាំងពលកម្មដែលអាចរកបាន។
ពិន្ទុល្អឥតខ្ចោះនៅក្នុងលិបិក្រមគឺ ០, នៅពេលដែលពួកគេកាន់តែជិតនឹងតួលេខនេះ យោធារបស់ពួកគេកាន់តែខ្លាំង។
ឆ្នាំនេះប្រទេសវៀតណាមទទួលបានពិន្ទុ ០,៣៩៨៨ និងឥណ្ឌូណេស៊ីឈរនៅលំដាប់ទី ១៦ លើពិភពលោក ០,២៨០៤ ពិន្ទុ។
នៅអាស៊ីអាគ្នេយ៍ប្រទេសថៃ ស្ថិតក្នុងចំណាត់ថ្នាក់ទី ២៦ បន្ទាប់មកគឺប្រទេសមីយ៉ាន់ម៉ា (លេខ ៣៧) ម៉ាឡេស៊ី (៤១) សិង្ហបុរី (ទី ៥៩) ហ្វីលីពីន (៦៤) កម្ពុជា (ទី ១០៧) និងឡាវ (ទី ១២៧) ។
របាយការណ៍នេះបាននិយាយថា ប្រទេសវៀតណាមមានយន្តហោះសរុបចំនួន ៣១៨ គ្រឿង ក្នុងនោះមានឧទ្ធម្ភាគចក្រ ១៤០ គ្រឿង បានដាក់ចំណាត់ថ្នាក់ទី ៣៣ ក្នុងប្រភេទនេះ ខណៈកម្លាំងរថក្រោះប្រយុទ្ធមានចំនួន ២,៥៧៥ គ្រឿង ជាប់ចំណាត់ថ្នាក់ទី ១០ ។
កម្លាំងទ័ពជើងទឹករបស់វៀតណាមដែលមានកប៉ាល់ចំនួន ៦៥ គ្រឿង បានដាក់វានៅចំណាត់ថ្នាក់ទី ៣៦ ។ ប្រទេសកូរ៉េខាងជើងឈរនៅលើកំពូលតារាងដោយមាននាវាចំនួន ៩៦៧ គ្រឿង។
ប្រទេសវៀតណាមមានបុគ្គលិកយោធាប្រមាណ ៥,៤ លាននាក់ ដោយមានប្រជាជន ១,៦៥ លាននាក់ មានអាយុចូលបម្រើយោធាជារៀងរាល់ឆ្នាំ៕ប្រែសម្រួលៈ ណៃ តុលា
