សេអ៊ូល៖ ប្រព័ន្ធផ្សព្វផ្សាយរដ្ឋបាន រាយការណ៍កាលពីថ្ងៃព្រហស្បតិ៍ថា ប្រទេសកូរ៉េខាងជើង បានហាមឃាត់ប្រជាជនមិនឱ្យប្រើប្រាស់មធ្យោបាយ ធ្វើដំណើរសាធារណៈដោយមិនពាក់ម៉ាស់ការពារ ជាវិធានការបង្ការទុកជាមុន ដើម្បីទប់ស្កាត់ការផ្ទុះឡើងនៃវីរុសកីរ៉ូណាថ្មីនេះ។
ប្រទេសកូរ៉េខាងជើង មិនបានរាយការណ៍អំពីការផ្ទុះឡើងនៃជំងឺផ្តាសាយកូវីដ-១៩ នោះទេប៉ុន្តែគេបានរាយការណ៍ថា បានដាក់មនុស្សរាប់ពាន់នាក់នៅក្រោមការត្រួតពិនិត្យផ្នែកវេជ្ជសាស្រ្ត ចំពោះការឆ្លងមេរោគ ដែលមានសក្តានុពល និងចាត់វិធានការបង្ការផ្សេងៗរួមទាំងការបិទព្រំដែនរបស់ខ្លួន និងការដាក់ឲ្យ នៅដាច់ឆ្ងាយពីគ្នាជាដេីម។
កាសែត Rodong Sinmun ដែលជាកាសែតផ្លូវការរបស់គណបក្សកាន់អំណាចកូរ៉េខាងជើង បានផ្សាយរឿងរ៉ាវ ស្តីពីគោលការណ៍ណែនាំចុងក្រោយ របស់ក្រុងព្យុងយ៉ាង សម្រាប់ពលរដ្ឋរបស់ខ្លួនក្នុងការប្រើប្រាស់មធ្យោបាយធ្វើដំណើរសាធារណៈដែលតម្រូវឲ្យអ្នកដំណើរពាក់ម៉ាស់ និងអនាម័យដៃមុនពេលឡើងជិះរថភ្លើង រថភ្លើងក្រោមដី ឡានក្រុង និងរថយន្តតាក់ស៊ី៕ដោយ ឈូក បូរ៉ា
