បរទេស៖ អ្នកនាំពាក្យ ក្រសួងការបរទេសរុស្ស៊ី លោកស្រី Maria Zakharova បានប្រកាសនៅថ្ងៃអង្គារថា ការដាក់ពង្រាយឡើងវិញ នូវអាវុធនុយក្លេអ៊ែរ របស់សហរដ្ឋអាមេរិក ពីប្រទេសអាល្លឺម៉ង់ ដល់ប្រទេសប៉ូឡូញ នឹងធ្វើឱ្យខូចខាត ដល់ទំនាក់ទំនងរវាង រុស្ស៊ី និង អង្គការ ណាតូ ដែលបានបង្កើនភាពតានតឹង។
យោងតាមសារព័ត៌មាន Sputnik ចេញផ្សាយនៅថ្ងៃទី១៩ ខែឧសភា ឆ្នាំ២០២០ បានឱ្យដឹងដោយផ្អែក តាមការលើកឡើង របស់លោកស្រី Zakharova ថា «យើងសង្ឃឹមថា រដ្ឋាភិបាលទីក្រុងវ៉ាស៊ីនតោន និង រដ្ឋាភិបាលទីក្រុង Warsaw ទទួលស្គាល់លក្ខណៈគ្រោះថ្នាក់ នៃសេចក្តីថ្លែងការណ៍បែបនេះ ដែលធ្វើឱ្យ មានរយៈពេលដ៏លំបាករួចទៅហើយ នៃទំនាក់ទំនងរវាងរុស្ស៊ីនិងណាតូ និងគំរាមកំហែង ដល់មូលដ្ឋានសន្តិសុខអឺរ៉ុបយ៉ាងខ្លាំង ដែលបានចុះខ្សោយជាលទ្ធផល នៃជំហ៊ានឯកតោភាគី របស់សហរដ្ឋអាមេរិក ពីដំបូងនិងសំខាន់ តាមរយៈការចាកចេញ ពីសន្ធិសញ្ញា INF ។
លោកស្រីបានបន្ថែមថា «សហរដ្ឋអាមេរិក អាចចូលរួមវិភាគទាន យ៉ាងពិតប្រាកដ ក្នុងការពង្រឹងសន្តិសុខអឺរ៉ុប ដោយបញ្ជូនក្បាលគ្រាប់នុយក្លេអ៊ែរ របស់អាមេរិកមកទឹកដីអាមេរិកវិញ។ រុស្ស៊ីបានធ្វើដូច្នេះជាយូរមកហើយ ដោយប្រគល់អាវុធនុយក្លេអ៊ែររបស់ខ្លួន មកទឹកដីរបស់ខ្លួនវិញ»។
ការលើកឡើង របស់អ្នកនាំពាក្យ ក្រសួងការបរទេសរុស្ស៊ីរូបនេះ ធ្វើឡើងបន្ទាប់ពីការកត់សម្គាល់ របស់ឯកអគ្គរដ្ឋទូតសហរដ្ឋអាមេរិក ប្រចាំប្រទេសប៉ូឡូញលោកស្រី Georgette Mosbacher កាលពីសប្តាហ៍មុន បានបង្ហាញថា“ ប្រសិនបើប្រទេសអាល្លឺម៉ង់ ចង់កាត់បន្ថយសក្តានុពល នៃការចែករំលែកនុយក្លេអ៊ែររបស់ខ្លួន និងធ្វើឱ្យណាតូចុះខ្សោយនោះ ប្រហែលជាប៉ូឡូញ ដែលបំពេញកាតព្វកិច្ចរបស់ខ្លួន ដោយស្មោះត្រង់ និងយល់ពីហានិភ័យ កងទ័ពភាគខាងកើត របស់ណាតូ អាចប្រើសក្តានុពលនេះនៅផ្ទះ៕ ប្រែសម្រួលៈ ណៃ តុលា
