Mark Zuckerberg ជាស្ថាបនិកបណ្តាញសង្គម Facebook និងជា CEO ដំបូងគេបង្អស់ដែលបានក្លាយជាមហាសេដ្ឋីនៅត្រឹមអាយុ២៣ឆ្នាំ ក្នុងឆ្នាំ២០០៨ បន្ទាប់ពី Facebook ត្រូវបានគេនិយមប្រើប្រាស់ទូទាំងសកលលោកក្នុងរយៈពេល៤ឆ្នាំ។
Mark គឺជាបុគ្គលម្នាក់ ដែលបានកសាងខ្លួនបានក្លាយជាមហាសេដ្ឋី វ័យក្មេងដោយខ្លួនឯងក្នុងប្រវត្តិសាស្រ្ត ។ បច្ចុប្បន្ន Mark Zuckerberg អាយុ៣៨ឆ្នាំ មានទ្រព្យសម្បត្តិប្រមាណជា ៦២,៥ ពាន់លានដុល្លារអាមេរិក។ មនុស្សភាគច្រើនប្រហែលជាគិតថា ភាពជោគជ័យរបស់ Facebook កើតឡើងដោយសារស្ថាបនិក របស់បណ្តោញសង្គមមួយនេះ បានបោះបង់ការរៀនសូត្រ នៅមហាវិទ្យាល័យ ដើម្បីចំណោយពេលជាច្រើន នៅតែក្នុងបន្ទប់គេង នៃមហាវិទ្យាល័យ Harvard ធ្វើរឿងដែលជាចំណូលចិត្ត និងទេពកោសល្យរបស់គាត់ គឺសរសេរកូដ ដើម្បីបង្កើតនូវបណ្ដាញ សង្គមហ្វេសប៊ុក ដ៏ធំសម្បើមនេះឡើង។
ការពិតជាក់ស្ដែងវាមិនមែនបែបនោះទេ គឺវាបណ្តាលមកពីការកសាងទំនាក់ទំនង កាលនៅរៀនមហាវិទ្យាល័យទៅវិញទេ ដែលជាធាតុផ្សំ នៃភាពជោគជ័យ របស់មហាសេដ្ឋីវ័យក្មេង Mark Zuckerberg រូបនេះ ទោះបីលោកមិន បានរៀនចប់មហាវិទ្យាល័យក៏ដោយក្តី ។ មហាសេដ្ឋី ដែលបានចាប់ផ្តើមអាណាចក្ររបស់ខ្លួនក្នុងវ័យ១៩ឆ្នាំរូបនេះ ជាមួយនិងដៃគូរដ៏ល្អរបស់គាត់៤រូប ដែលមានចំណូលចិត្តដូចគ្នា ក្នុងការសរសេរកូដនា ពេលវ័យជំទង់របស់ពួកគេ ដើម្បីបង្កើតក្រុមហ៊ុន ដ៏មានឥទ្ធិពលមួយនាពេលបច្ចុប្បន្ន។
គេនៅចាំបាននៅក្នុង Podcast មួយកាលពីឆ្នាំ២០១៩ លោក Mark Zuckerberg បានលើកឡើងអំពីទំនាក់ទំនង ក្នុងភាពជាវ័យជំទង់ គឺជាការសម្រេចចិត្តដ៏សំខាន់ បំផុតរបស់យុវជន ក្នុងការកសាងមិត្តភាព ដើម្បីអនាគត ។ ជាមួយគ្នានោះសហការី ដែលត្រូវ ជាមិត្តរបស់មហាសេដ្ឋីបច្ចេកវិទ្យារូបនេះ មានចំនួន៤រូប ដែលបានរួមដំណើរជាមួយគ្នាចាប់ តាំងពីអំឡុងឆ្នាំ២០០០មកម្ល៉េះ។
មេរៀនធំមួយដែលមហាសេដ្ឋីបច្ចេកវិទ្យាបានរៀនសូត្រក្នុងការកសាងទំនាក់ទំនងសម្រាប់មនុស្សវ័យជំទង់គឺ “ផ្តោតលើការកសាងទំនាក់ទំនង ជាជាងផ្តោតលើគោលបំណង” ពោលកសាងទំនាក់ទំនងដោយមិនគិតអំពីគោលបំណងខ្លាំង ពេក Mark បានបន្តបង្ហាញថា “យុទ្ធសាស្ត្របង្កើតបរិយាកាស ការងារកាន់តែស្អិតរមួត និង បង្កើនផលិតភាព កាន់តែច្រើន ប្រសិនបើអ្នកធ្វើការ ជាមួយមនុស្សដែលផ្តល់តម្លៃ ដល់អ្នកក្នុងការងារ អ្នកទំនងជាអាចសម្រេច បាននូវគោលដៅការងាររបស់អ្នកជាមួយគ្នាយ៉ាងរលូន”។ លោកបាននិយាយថា វាគឺជាការស្វែងរកភាពត្រូវគ្នាផ្ទាល់ខ្លួន មិនខុសពី “ការជ្រើសរើសដៃគូ” នោះទេ ។
គួររម្លឹកថាលោក Mark Zuckerberg បានជួបសហស្ថាបនិក Facebook របស់គាត់ Eduardo Saverin, Dustin Moskovitz, Chris Hughes និង Andrew McCollum ខណៈដែលអ្នកទាំងប្រាំនាក់គឺជានិស្សិត នៅសាកលវិទ្យាល័យ Harvard នៅដើមទសវត្សរ៍ឆ្នាំ ២០០០ ។ ដោយឡែកការងារ របស់ពួកគេ បានធ្វើបដិវត្តប្រព័ន្ធផ្សព្វផ្សាយសង្គម និងពិភពលោកដោយបានក្លាយជាក្រុមហ៊ុន ដែលមានមូលធនប័ត្រទីផ្សារចំនួន ៥៣៨ពាន់លានដុល្លារ គិតត្រឹមឆ្នាំ២០២២ ៕
