ក្រុមហ៊ុនចិន China Metro Group គ្រោងអភិវឌ្ឍផ្លូវរថភ្លើងធុនស្រាលចំនួន២ខ្សែគឺ៖
១. គម្រោងផ្លូវរថភ្លើង ធុនស្រាលតភ្ជាប់ពីអាកាសយានដ្ឋាន អន្តរជាតិ ខេត្តសៀមរាប-អង្គរ ទៅកាន់ក្រុងសៀមរាប
២. គម្រោងផ្លូវរថភ្លើងធុនស្រាល តភ្ជាប់ពីអាកាសយានដ្ឋានអន្តរជាតិតេជោ ទៅកាន់រាជធានីភ្នំពេញ។
គម្រោងនេះត្រូវបានបញ្ជាក់ដោយលោក Li Kuo ប្រធានក្រុមប្រឹក្សាភិបាលក្រុមហ៊ុន China Metro Group ក្នុងជំនួបពិភាក្សាជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា នាព្រឹកថ្ងៃទី១៧ ខែតុលា ឆ្នាំ២០២៣ ក្នុងអំឡុងពេលសម្តេចចូលរួម «វេទិកាខ្សែក្រវាត់ និងផ្លូវ លើកទី៣» នៅក្រុងប៉េកាំង។
លោកប្រធានក្រុមប្រឹក្សាភិបាល ក៏បានបន្ថែមថា ក្រុមហ៊ុន ក៏នឹងសិក្សាអំពីលទ្ធភាពផ្សេងៗ ក្នុងការជួយសម្រាលបន្ទុកចរាចរណ៍នៅកម្ពុជាផងដែរ។
ជាការឆ្លើយតប សម្តេចធិបតីនាយករដ្ឋមន្ត្រី បានថ្លែងអំណរគុណ និងបានបញ្ជាក់អំពីការគាំទ្រចំពោះគម្រោងនានា ដែលក្រុមហ៊ុន China Metro Group បាន និងកំពុងសិក្សានៅក្នុងប្រទេសកម្ពុជា ពាក់ព័ន្ធនឹងការដោះស្រាយបញ្ហាចរាចរណ៍ ព្រមទាំងបានផ្តល់ជាអនុសាសន៍ ដល់ក្រុមហ៊ុន ឱ្យមានការគិតគូរសព្វគ្រប់ជ្រុងជ្រោយ មានជាអាទិ៍ ការអភិវឌ្ឍផ្លូវដែកធុនស្រាល, ស្ពានអាកាស និងផ្លូវក្រោមដីជាដើម ៕
