សិង្ហបុរី៖ ដោយនាយករដ្ឋមន្ត្រីសិង្ហបុរី លោក Lee Hsien Loong បានប្រកាសកាលពីល្ងាចថ្ងៃអាទិត្យថា រដ្ឋាភិបាលនឹងលុបចោលច្បាប់ស្តីពីការរួមភេទរវាងបុរស ដោយលើកឡើងពីការផ្លាស់ប្តូរអាកប្បកិរិយារបស់សង្គម។
ប៉ុន្តែលោក លី ដែលបានប្រកាសលុបចោលបទប្បញ្ញត្តិ នៃក្រមព្រហ្មទណ្ឌក្នុងសម័យអាណានិគម ក្នុងអំឡុងពេលសុន្ទរកថាថ្ងៃបុណ្យជាតិ បានលើកឡើងថា ប្រទេសសិង្ហបុរី នឹងបន្តកំណត់ការរៀបការជារវាងបុរស និងស្ត្រី។
លោកបានឲ្យដឹងនៅក្នុងសុន្ទរកថា ដែលធ្វើឡើងបន្ទាប់ពីថ្ងៃទី០៩ ខែសីហា ហើយត្រូវបានគេចាត់ទុកថាជាសុន្ទរកថា ដ៏សំខាន់បំផុតប្រចាំឆ្នាំរបស់មេដឹកនាំសិង្ហបុរីថា “ខណៈពេលដែលយើង នៅតែជាសង្គមអភិរក្សនិយម យ៉ាងទូលំទូលាយ មនុស្សស្រលាញ់ភេទដូចគ្នាឥឡូវនេះ ត្រូវបានទទួលយកកាន់តែប្រសើរឡើង នៅក្នុងប្រទេសសិង្ហបុរី ជាពិសេសក្នុងចំណោមប្រជាជនសិង្ហបុរីវ័យក្មេង”។
លោកបានបន្ថែមថា “ប្រទេសជាច្រើនដែលធ្លាប់មានច្បាប់ប្រឆាំងនឹងការរួមភេទ រវាងបុរសចាប់តាំងពីពេលនោះ មកបានលុបចោលច្បាប់នោះវិញ” រួមទាំងប្រទេសអាស៊ីមួយចំនួនផងដែរ។
បញ្ហានេះបានក្លាយជាបញ្ហាដ៏រសើបមួយ ដែលបានបែងចែកប្រជាជនចម្រុះជាតិសាសន៍ និងពហុសាសនា ដោយក្រុមមូស្លីម និងកាតូលិក សម្តែងការព្រួយបារម្ភ លើការសេរីភាវូបនីយកម្មជំហរ ឆ្ពោះទៅរកការស្រឡាញ់ភេទដូចគ្នា ។
លោក លី បានបន្ដថា រដ្ឋាភិបាល “នឹងការពារនិយមន័យនៃអាពាហ៍ពិពាហ៍ពីការជំទាស់ដោយរដ្ឋធម្មនុញ្ញនៅក្នុងតុលាការ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
គួរបញ្ជាក់ថា ផ្នែកទី 377A នៃក្រមព្រហ្មទណ្ឌ ដែលត្រូវបានណែនាំក្នុងទសវត្សរ៍ឆ្នាំ១៩៣០ ដោយអាជ្ញាធរអាណានិគមអង់គ្លេស ត្រូវបានជំទាស់ជាច្រើនដងនៅក្នុងតុលាការ ដោយមិនទទួលបានជោគជ័យ បន្ទាប់ពីការជជែកដេញដោល ក្នុងឆ្នាំ ២០០៧ រដ្ឋាភិបាលបានសម្រេចចិត្តទុកច្បាប់ លើសៀវភៅនេះ ប៉ុន្តែលែងអនុវត្តវាទៀតហើយ៕
