បរទេស ៖ កងទ័ពបរទេស ក្រោមបញ្ជាការអង្គការណាតូ នឹងដកចេញពីប្រទេស អាហ្វហ្គានីស្ថាន រួមជាមួយការដកទ័ព អាមេរិក នៅត្រឹមថ្ងៃទី១១ ខែកញ្ញា នេះបើតាមសម្តី រដ្ឋមន្ត្រីការបរទេសអាមេរិក និយាយនៅថ្ងៃពុធនេះ ក្រោយអាល្លឺម៉ង់ និយាយថា វាត្រូវគ្នានឹងផែនការ អាមេរិក ក្នុងការចាកចេញក្រោយសង្គ្រាម អស់ពេល២ទសវត្ស ។
គួរបញ្ជាក់ថា កងកម្លាំងមិនមែន អាមេរិកប្រមាណ៧.០០០នាក់ មកពីប្រទេសសមាជិកណាតូ ភាគច្រើន និងមកពីអូស្ត្រាលី នូវេលសេឡង់ និងហ្សកហ្ស៊ី មានចំនួនលើសកងទ័ពអាមេរិក ២៥០០ នាក់ នៅក្នុងប្រទេសអាហ្វហ្គានីស្ថាន ប៉ុន្តែនៅតែពឹងផ្អែក លើការគាំទ្រ ដែនអាកាសពីអាមេរិក ការរៀបផែនការ និងដឹកនាំបេសកកម្ម ហាត់សមរបស់ពួកគេ ។
រដ្ឋមន្ត្រីការបរទេស សហរដ្ឋអាមេរិក លោក Antony Blinken បានមានប្រសាសន៍ ក្នុងទីក្រុងព្រួចសែលថា វាជាពេលដែលសម្ពន្ធមិត្តណាតូ ត្រូវធ្វើឲ្យបានល្អលើទស្សនៈ របស់ពួកគេ ដែលថា សម្ពន្ធមិត្តចូលក្នុងប្រទេស អាហ្វហ្គានីស្ថានទំាងអស់គ្នា និងចាកចេញវិញទាំងអស់គ្នា ។
ក្នុងសេចក្តីថ្លែងការណ៍មួយនៅទីស្នាក់ការកណ្ដាល របស់ណាតូ លោករដ្ឋមន្ត្រីការបរទេស សហរដ្ឋអាមេរិក បានមានប្រសាសន៍យ៉ាងដូច្នេះថា “ខ្ញុំនៅទីនេះ ដើម្បីធ្វើការងារយ៉ាងជិតស្និទ្ធ ជាមួយសម្ពន្ធមិត្តរបស់យើង ជាំមួយអគ្គ លេខាធិការ (ណាតូ) ស្តីពីគោលការណ៍ ដែលយើងបានបង្កើតឡើង ពីពេលចាប់ផ្តើមថា ចូលរួមគ្នា សម្របខ្លួនរួមគ្នា និងចាកចេញទាំងអស់គ្នា” ៕ ប្រែសម្រួល៖ប៉ាង កុង
