សហភាព អារ៉ាប់រួម ទាក់ទាញ វិនិយោគ បរទេស ២០ពាន់លានដុល្លារ ក្នុងឆ្នាំ២០២០

បរទេស៖រដ្ឋាភិបាលនៃប្រទេសសហភាព អារ៉ាប់រួម នៅពេលថ្មីៗនេះ តាមសេចក្តីរាយការណ៍ បាននិយាយប្រាប់ថា ការវិនិយោគផ្ទាល់ពីបរទេសចូលមកក្នុង សហភាពអារ៉ាប់រួម បានកើនឡើងដល់ចំនួន១៩,៨៨ ពាន់លានដុល្លារ គឺកើនចំនួន៤៤ភាគរយ បើប្រៀបនឹងឆ្នាំមុននោះ។

ទីភ្នាក់ងារសារព័ត៌មានរដ្ឋ WAM បាននិយាយប្រាប់ដោយមិនបានផ្តល់សេចក្តីលម្អិតបន្ថែមទៀតថា ការរួមចំណែកដល់តួលេខនេះ គឺជាកិច្ចព្រមព្រៀងដ៏ធំ ដែលធ្វើឡើងដោយក្រុមហ៊ុនរដ្ឋ Abu Dhabi National Oil Co (ADNOC)។

រដ្ឋមន្ត្រីសេដ្ឋកិច្ច លោក Abdullah al-Marri បានមានប្រសាសន៍ថា សហភាពអារ៉ាប់រួម នឹងបោះជំហានទៅមុខជាមួយគោលគំនិត បង្កើនប្រសិទ្ធភាពបរិយាកាសពាណិជ្ជកម្ម ពង្រឹងទំនុកចិត្តអ្នកវិនិយោគ បង្កើនឱកាសក្នុងវិស័យអាទិភាពនានា និងបង្រួបបង្រួមកិច្ចខិតខំប្រឹងប្រែង ធ្វើឲ្យប្រសើរឡើងនូវការប្រកួតប្រជែងនៅកម្រិតក្នុងស្រុកនិងសហព័ន្ធ។

គួរបញ្ជាក់ថា យោងតាមរបាយការណ៍វិនិយោគពិភពលោកឆ្នាំ២០២០របស់ UNCTAD បានឲ្យដឹងថា សហភាពអារ៉ាប់រួម បានឃើញលំហូចូលនៃកំណើនវិនិយោគបរទេសផ្ទាល់ចំនួន៣២ភាគរយ នៅចន្លោះឆ្នាំ២០១៨និង២០១៩ ដោយមានទឹកប្រាក់វិនិយោគដល់ទៅ១៣,៨ពាន់លានដុល្លារ៕