Microsoft បានក្លាយជា ក្រុមហ៊ុនផ្តាច់មុខដែលនឹងផ្គត់ផ្គង់វ៉ែនតា AR ជាមួយបច្ចេកវិទ្យា HoloLens ផ្ទាល់របស់ខ្លួនដល់កងទ័ពសហរដ្ឋអាមេរិក ក្នុងចំនួនរហូតដល់ទៅ ១២ ម៉ឺនគ្រឿងឯណោះ។
កងទ័ព កំពុងពាក់សាកល្បង AR ជំនាន់ទី១
ក្នុងទំហំទឹកប្រាក់ដែល Microsoft ទទួលបានពីដេញថ្លៃលើកិច្ចព្រមព្រៀង ផ្គត់ផ្គង់វ៉ែនតា AR ប្រមាណជា ២១ប៊ីលានដុល្លារគិតក្នុងរយៈពេល ១០ ឆ្នាំ។ វ៉ែនតា AR នេះនឹងក្លាយជាជំនួយការ ដល់កងទ័ពនៅក្នុងសមរភូមិ ។
ដូចអ្នកទាំងអស់គ្នា បានជ្រាបរួចហើយថា Microsoft គឺជាក្រុមហ៊ុនដែលមានជំនាញ ខ្ពស់ខាងបង្កើត Software។ ចំពោះបច្ចេកវិទ្យា Hololends នេះពួកគេបានសម្ងំអភិវឌ្ឍអស់ជាច្រើន ឆ្នាំមកហើយ ។
សម្រាប់លក្ខណៈពិសេសរបស់វែនតា AR នោះនៅផ្នែកផ្ទៃកញ្ចក់អេក្រង់ គឺមានភ្ជាប់មកនូវត្រីវិស័យ សម្រាប់បង្ហាញទិសដៅ ទៅកាន់តំបន់ណាមួយ និងអាចធ្វើការបង្ហាញពីទីតាំង របស់កងទ័ពណាមួយ ទៅឱ្យមិត្តកងទ័ពផ្សេងៗ បានទៀតផង។
វាក៏អាចបង្ហាញជានិមិត្តសញ្ញា សំដៅទៅកាន់ទីតាំងណាមួយ ដែលកងទ័ពបានតម្រង់កាំភ្លើង ទៅកាន់ទីនោះបានផងដែរ ដើម្បីជួយឱ្យបាញ់ចំគោលដៅត្រឹមត្រូវល្អ ឯកញ្ចក់អេក្រង់នោះ គឺជាប្រភេទ FLIR មើលយប់បានទៀត ។
ដូច្នេះ វ៉ែនតា HoloLens អាចជួយឱ្យកងទ័ពអាមេរិក មើលនៅពេលងងឹត ឬក្នុងទីងងឹតបាន (Night Vision) និងអាចមើលឃើញសត្រូវបាន នៅក្នុងតំបន់ព្រៃ និងពេលមានផ្សែងច្រើនថែមទៀតផង៕ sabay
