ប៉េកាំង៖ អ្នកនាំពាក្យក្រសួងការបរទេស បានឲ្យដឹងថា មួយរយៈកន្លងមកនេះ វិទ្យុសំឡេងសហរដ្ឋអាមេរិក (VOA) បានសហការជាមួយរដ្ឋាភិបាល សហរដ្ឋអាមេរិក ដើម្បីធ្វើនយោបាយលើបញ្ហាជាច្រើន ទាក់ទងនឹងប្រទេសចិន ក្នុងគោលបំណងទប់ស្កាត់ និងបង្ក្រាបប្រទេសចិន។
អ្នកនាំពាក្យចិនលោក ចាវ លីជៀន បានធ្វើការកត់សម្គាល់ ជាការឆ្លើយតបទៅនឹង “របាយការណ៍ចុងឆ្នាំ” ដែលត្រូវបានចេញផ្សាយ នាពេលថ្មីៗនេះដោយ VOA ដែលអះអាងថានៅឆ្នាំ២០២១ ប្រទេសចិន បានធ្វើឱ្យខូចសិទ្ធិមនុស្ស និងនីតិរដ្ឋ នៅក្នុងទីក្រុងហុងកុង និងបានប្រព្រឹត្តិទៅ នូវអ្វីដែលគេហៅថា “អំពើប្រល័យពូជសាសន៍” នៅក្នុងតំបន់ស៊ីនជាំង ។
លោក ចាវ បានលើកឡើងថា “VOA តែងតែព្រងើយកន្តើយនឹងការពិត ហើយសម្លឹងមើលប្រទេសចិន ដោយវ៉ែនតាពណ៌។ វាពិបាកក្នុងការស្វែងរកអ្វី ដែលល្អអំពីប្រទេសចិន នៅក្នុងរបាយការណ៍ របស់ពួកគេណាស់” ។
អ្នកនាំពាក្យរូបនេះ បានគូសបញ្ជាក់ថា មិនយូរប៉ុន្មានអតីតបុគ្គលិក VOA បានលើកឡើងថា លោកមិនបានដឹងទាល់ តែលោកមកប្រទេសចិនថា សេចក្តីរាយការណ៍របស់ VOA ដែលលោកបានអានរាល់ថ្ងៃ គឺផ្ទុយស្រឡះពីស្ថានការណ៍ពិត នៅក្នុងប្រទេសចិន។
អ្នកយកព័ត៌មាន ក៏បានឲ្យដឹងផងដែរថា មនុស្សមួយចំនួនដែលធ្វើការឱ្យ VOA ត្រូវបានបណ្តេញចេញ ពីព្រោះពួកគេស្នើឱ្យបង្កើន ការរាយការណ៍ ជាវិជ្ជមានរបស់ប្រទេសចិន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
អ្នកនាំពាក្យរូបនេះ បានបន្ដថា “វាគួរឲ្យរន្ធត់ណាស់ ដែលគិតពីការពិត ដែលមនុស្សមួយក្រុម ដែលមិនមាន ចំណាប់អារម្មណ៍ពិតប្រាកដ ក្នុងការសិក្សាអំពីប្រទេសចិន ហើយទៅធ្វើការឲ្យ VOA រាយការណ៍ និងផ្តល់យោបល់អំពីប្រទេសចិន”។
លោកបានបន្ថែមថា ទំនាក់ទំនងរវាង VOA និងរដ្ឋាភិបាលសហរដ្ឋអាមេរិក ត្រូវបានគេស្គាល់គ្រប់គ្នា នៅលើផែនដី “ប្រសិនបើយើងយល់ពីចំណុចនេះ វាមិនពិបាកសម្រាប់យើង ក្នុងការយល់ពីអាកប្បកិរិយា របស់ VOA នោះទេ”៕ ដោយ ឈូក បូរ៉ា
