ក្រុងប៉េកាំង ៖ យោងតាមការចេញផ្សាយ ពីគេហទំព័រឌឺវីប៊ីស បាននិយាយថា ក្រុមហ៊ុនបច្ចេកវិទ្យាយក្ស របស់ចិន រួមមាន Alibaba, Tencent និង ByteDance បានដាក់សេចក្តីលម្អិត ទៅកាន់និយតកររដ្ឋ នៃក្បួនដោះស្រាយ ដែលបានប្រើលើ ផលិតផលមួយចំនួន របស់ពួកគេ នៃការផ្លាស់ប្តូរមិន ធ្លាប់មានពីមុនមក ខណៈអាជ្ញាធរពង្រឹង ការត្រួតពិនិត្យវិស័យនេះ ។
ក្រុមឃ្លាំមើលអ៊ីនធើណេត របស់ប្រទេស បានចេញផ្សាយបញ្ជី នៃក្បួនដោះស្រាយចំនួន៣០ ដែលក្រុមហ៊ុនប្រើប្រាស់ ដើម្បីប្រមូលព័ត៌មាន អំពីអ្នកប្រើប្រាស់ និងផ្សព្វផ្សាយខ្លឹមសារ ឬសេវាកម្ម ។ ក្បួនដោះស្រាយប្រើ ដោយក្រុមហ៊ុនបច្ចេកវិទ្យា ត្រូវបានការពារយ៉ាងជិតស្និត នៅទូទាំងពិភពលោក ប៉ុន្តែនាខែមីនា ប្រទេសចិន បានដាក់ចេញ នូវបទប្បញ្ញត្តិ តម្រូវឲ្យក្រុមហ៊ុន បង្ហាញឧបករណ៍ទាំងនេះ នៅពេលដែលមានការព្រួយ បារម្ភកើនឡើងអំពីការប្រើប្រាស់ ទិន្នន័យខុស ។
ទីក្រុងប៉េកាំងក្នុងប៉ុន្មានឆ្នាំថ្មីៗនេះ បានចាប់ផ្តើមការគៀបយ៉ាងទូលំទូលាយ លើវិស័យបច្ចេកវិទ្យា បានមើលឃើញពីការរីកចម្រើន ជាច្រើនឆ្នាំ និងការលេចចេញនូវភាពផ្តាច់មុខ លើសលុប មុនពេលនិយតករ ឈានជើងចូល ។ លោកស្រី Angela Zhang សាស្ត្រាចារ្យរងផ្នែកច្បាប់ នៅសាកលវិទ្យាល័យហុងកុង បាននិយាយថា ច្បាប់ បានចេញកាលពីខែមីនា តម្រូវឲ្យក្រុមហ៊ុននានា ធានាថា ពួកគេនឹងមិនចូលរួម ក្នុងសកម្មភាព អាចគំរាមកំហែងដល់ សន្តិសុខជាតិ ស្ថិរភាពសង្គម ឬលើកទឹកចិត្តឲ្យមានការបណ្ដោយខ្លួន ហួសហេតុនោះទេ ។
លោកស្រីបានប្រាប់ AFP ថា វាតម្រូវឲ្យអ្នកផ្តល់សេវាទាំងនេះ ធ្វើការវាយតម្លៃដោយខ្លួនឯងជាទៀងទាត់ ដើម្បីធានាបាននូវការ អនុលោមតាម និងដើម្បីដាក់កំណត់ត្រា របស់ពួកគេជាមួយអាជ្ញាធរពាក់ព័ន្ធ ។គោលដៅនៃបទប្បញ្ញត្តិចុងក្រោយ បង្អស់មានចាប់ពីវេទិកា Weibo ស្រដៀងនឹង Twitter របស់ប្រទេសចិន រហូតដល់សេវាកម្មដឹកជញ្ជូន Meituan និងកម្មវិធីវីដេអូខ្លី Douyin របស់ ByteDance ៕ដោយ៖លី ភីលីព
