បរទេស៖ លោកស្រី Fiona Hill អតីតទីប្រឹក្សាសេតវិមាន បានប្រាប់ទស្សនាវដ្តី New Yorker កាលពីថ្ងៃព្រហស្បតិ៍ថា ប្រទេសលោកខាងលិច បានប្រយុទ្ធនឹងសង្គ្រាមលោកលើកទី៣ ប្រឆាំងនឹងប្រទេសរុស្ស៊ី “អស់រយៈពេលជាយូរមកហើយ” ដោយមិនដឹងខ្លួន។ ទោះបីជាយ៉ាងណាក៏ដោយ ទីក្រុងមូស្គូបានដឹងហើយ ដោយប្រធានាធិបតី វ្ល៉ាឌីមៀ ពូទីន បានចោទប្រកាន់ លោកខាងលិចសមូហភាពថា កំពុងធ្វើ “សង្រ្គាមកូនកាត់” មកលើប្រទេសរុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី៣០ ខែកញ្ញា ឆ្នាំ២០២២ បានឱ្យដឹងថា លោកស្រី Hill ដែលបានបម្រើការ នៅក្នុងក្រុមប្រឹក្សាសន្តិសុខជាតិរបស់លោក Donald Trump មុនពេលផ្តល់ភស្តុតាងប្រឆាំងនឹងគាត់ ក្នុងអំឡុងពេលការស៊ើបអង្កេត ការចោទប្រកាន់ឆ្នាំ២០១៩ បាននិយាយថា “យើងបានស្ថិតនៅក្នុងរឿងនេះជាយូរមកហើយ ហើយយើងមិនបានទទួលស្គាល់វាទេ” ។
ជាមួយនឹងសហរដ្ឋអាមេរិក បានគាំទ្ររដ្ឋប្រហារ នៅទីក្រុងគៀវក្នុងឆ្នាំ ២០១៤ និងផ្គត់ផ្គង់ជំនួយយោធា ដល់អ៊ុយក្រែន ខណៈពេលដែលខ្លួនបានធ្វើសង្គ្រាម ប្រឆាំងនឹងសាធារណរដ្ឋប្រជាមានិត Donetsk និង Lugansk ក្នុងរយៈពេល៨ ឆ្នាំចាប់តាំងពីពេលនោះមក។
លោកស្រី Hill បានស្នើថា ទីក្រុងវ៉ាស៊ីនតោន អាចវាយតម្លៃឡើងវិញ នូវគោលនយោបាយគាំទ្រអ៊ុយក្រែន ដោយមិនឱ្យក្លាយជាភាគីផ្ទាល់ ដល់ជម្លោះនេះ។
ខណៈពេលដែលលោកស្រី Hill មិនបានហៅដោយផ្ទាល់ថា សហរដ្ឋអាមេរិក ចូលក្នុងសង្រ្គាមបើកចំហជាមួយរុស្ស៊ី តែក៏មានសមាជិកសភាអាមេរិកផ្សេងទៀត និងអតីតមន្ត្រី គឺបានធ្វើ។ មិនយូរប៉ុន្មានបន្ទាប់ពីកងទ័ពរុស្ស៊ី បានចូលទៅក្នុងអ៊ុយក្រែន ក្នុងខែកុម្ភៈ ក្រុមអ្នកជំនាញសន្តិសុខជាតិទាំងនេះ បានអំពាវនាវឱ្យប្រធានាធិបតី Joe Biden ពង្រឹង “តំបន់គ្មានការហោះហើរ” លើអ៊ុយក្រែន។ វិធានការបែបនេះនឹងមើលឃើញថា សហរដ្ឋអាមេរិក និងសម្ព័ន្ធមិត្តណាតូដែលមានឆន្ទៈ ប្តេជ្ញាបាញ់ទម្លាក់យន្តហោះរុស្ស៊ី ដែលជាអ្វីដែលទីក្រុងម៉ូស្គូ បាននិយាយយ៉ាងច្បាស់ថា ខ្លួននឹងយល់ថាជាទង្វើនៃសង្គ្រាម៕ ប្រែសម្រួលៈ ណៃ តុលា
