អាមេរិក៖គ្រាប់រ៉ុក្កែត SpaceX បានហោះឡើងទៅកាន់គន្លងតារាវិថីពីរដ្ឋផ្លរីដាកាលពីថ្ងៃពុធ ដោយដឹក នាវិកស្ថានីយ៍អវកាសអន្តរជាតិជាមួយអវកាសយានិករុស្ស៊ី ជនជាតិអាមេរិក២នាក់ និងអវកាសយានិកជប៉ុនម្នាក់ ហោះហើររួមគ្នាក្នុងការបង្ហាញអំពីការងារជាក្រុមរវាងសហរដ្ឋអាមេរិក និងរុស្ស៊ីក្នុងលំហ ទោះបីជាមានភាពតានតឹងក្នុងសង្គ្រាមអ៊ុយក្រែន ក៏ដោយយោងតាមការចេញផ្សាយពីគេហទំព័រជប៉ុនធូដេ។
មន្ត្រីជាន់ខ្ពស់នៃទីភ្នាក់ងារអវកាសរុស្ស៊ី Roscosmos បាននិយាយភ្លាមៗ បន្ទាប់ពីការបាញ់បង្ហោះថា ការហោះហើរនេះបានសម្គាល់ដំណាក់កាលថ្មីនៃកិច្ចសហប្រតិបត្តិការរបស់យើងជាមួយទីភ្នាក់ងារអវកាសអាមេរិកណាសា “NASA” ។ យានបាញ់បង្ហោះ SpaceX រួមមានគ្រាប់រ៉ុក្កែត Falcon 9 បំពាក់ដោយគ្រាប់រ៉ុក្កែត Crew Dragon មានឈ្មោះថា Endurance បានហោះឡើងលើមេឃស្រឡះនៅពេលថ្ងៃត្រង់ពីមជ្ឈមណ្ឌលអវកាស Kennedy របស់ណាសានៅ Cape Canaveral ។ Falcon 9 កម្ពស់ ២៣ ជាន់ មាន២ដំណាក់កាលបានឡើងពីប៉មបាញ់បង្ហោះ ខណៈម៉ាស៊ីន Merlin៩ របស់វាបានបញ្ចេញចំហាយទឹក និងដុំភ្លើងពណ៌ទឹកក្រូចក្រហម។
បេសកកម្មនេះគួរឲ្យកត់សម្គាល់សម្រាប់ការបញ្ចូននាង Anna Kikina អាយុ ៣៨ ឆ្នាំជាអវកាសយានិកស្ត្រីឯកកោនៅលើកាតព្វកិច្ចសកម្មជាមួយ Roscosmos ធ្វើឲ្យវាក្លាយជាការហោះហើរអវកាសដំបូងជាមួយរុស្ស៊ីបានបាញ់បង្ហោះពីដីសហរដ្ឋអាមេរិកក្នុងរយៈពេល២ទសវត្សរ៍។ នៅពេលយានអវកាសបានចូលទៅក្នុងគន្លងផែនដី Kikina បានផ្សាយវិទ្យុដោយអរគុណដល់អង្គការណាសា Roscosmos និងដៃគូស្ថានីយអវកាសអន្តរជាតិ (ISS) សម្រាប់ផ្តល់ឲ្យយើងនូវឱកាសដ៏អស្ចារ្យនេះ។
នាង Kikina បាននិយាយថា យើងរីករាយណាស់ដែលបានធ្វើវាជាមួយគ្នា។ Kikina បានហ្វឹកហាត់នៅសហរដ្ឋអាមេរិកសម្រាប់ការហោះហើរតាំងពីនិទាឃរដូវឆ្នាំ ២០២១ មកនោះ បានផ្លាស់ប្តូរកន្លែងដ៏សំខាន់ជាមួយអវកាសយានិកណាសាដែលបានអង្គុយនៅលើជើងហោះហើរ Soyuz របស់រុស្ស៊ីទៅកាន់ ISS កាលពីខែមុន ក្រោមកិច្ចព្រមព្រៀងចែករម្លែកជិះថ្មីដែលចុះហត្ថលេខាដោយណាសា និង Roscosmosកាលខែកក្កដា។
ប្រហែល៩នាទីបន្ទាប់ពីការបាញ់បង្ហោះកាលពីថ្ងៃពុធ ដំណាក់កាលខាងលើរបស់រ៉ុក្កែតបានបញ្ជូន Crew Dragon ទៅកាន់គន្លងបឋម ខណៈវាបានហោះកាត់លំហក្នុងល្បឿនជិត ២៧,000 គីឡូម៉ែត្រក្នុងមួយម៉ោង។
ឧបករណ៍ជំរុញកម្រិតទាបដែលអាចប្រើឡើងវិញបានបានហោះត្រឡប់មកផែនដីវិញ ហើយបានចុះចតដោយសុវត្ថិភាពនៅលើនាវាសង្គ្រោះយន្តហោះគ្មានមនុស្សបើកនៅសមុទ្រ៕
ដោយ៖លី ភីលីព
