បាងកក៖ ក្រសួងពាណិជ្ជកម្មសហរដ្ឋអាមេរិក កំពុងបន្ថែមក្រុមហ៊ុនបច្ចេកវិទ្យាខ្ពស់របស់ចិន ចំនួន ៣៦ រួមទាំងក្រុមហ៊ុនផលិតឧបករណ៍អាកាសចរណ៍ សារធាតុគីមី និងបន្ទះសៀគ្វីកុំព្យូទ័រ ទៅក្នុងបញ្ជីខ្មៅ គ្រប់គ្រងការនាំចេញ ដោយលើកឡើងពីការព្រួយបារម្ភ អំពីសន្តិសុខជាតិ ផលប្រយោជន៍សហរដ្ឋអាមេរិក និងសិទ្ធិមនុស្ស យោងតាមការចេញផ្សាយ ពីគេហទំព័រជប៉ុនធូដេ។
ការដាក់បញ្ចូលក្រុមហ៊ុនក្នុងពាណិជ្ជកម្ម “បញ្ជីអង្គភាព” មានន័យថា អាជ្ញាប័ណ្ណនាំចេញទំនងជាត្រូវបានបដិសេធ សម្រាប់ក្រុមហ៊ុនអាមេរិកណាមួយព្យាយាម ធ្វើអាជីវកម្មជាមួយពួកគេ។ ក្នុងករណីខ្លះ ក្រុមហ៊ុនមានមូលដ្ឋាន នៅប្រទេសផ្សេងទៀត ក៏ត្រូវបានតម្រូវឲ្យគោរពតាមតម្រូវការ ដើម្បីការពារបច្ចេកវិទ្យាពីការបង្វែរ ទៅប្រើប្រាស់ត្រូវបានហាមឃាត់ ក្រោមការត្រួតពិនិត្យការនាំចេញ។
ទង្វើនេះបង្ហាញពីការពង្រឹងកិច្ចខិតខំប្រឹងប្រែង របស់សហរដ្ឋអាមេរិក នៃការរារាំងប្រទេសចិន ជាពិសេសយោធារបស់ខ្លួន ពីការទទួលបានបច្ចេកវិទ្យាទំនើបៗ ដូចជាបន្ទះសៀគ្វីកុំព្យូទ័រឈានមុខគេ និងអាវុធល្បឿនលឿនជាងសំឡេង។
វាជាការកើនឡើងចុងក្រោយបំផុត ក្នុងរយៈពេលជាច្រើនឆ្នាំនៃការរឹតត្បិត របស់សហរដ្ឋអាមេរិកចំពោះបច្ចេកវិទ្យារបស់ចិន បានចាប់ផ្តើមពីលោកប្រធានាធិបតី Donald Trump ហើយបានបន្តស្ថិតក្រោមការគ្រប់គ្រង របស់ប្រធានាធិបតី Joe Biden។
ជាមួយគ្នានេះ រដ្ឋបាល Biden កំពុងផ្លាស់ប្តូរដើម្បីបង្កើនសមត្ថភាព ផលិតរបស់អាមេរិក សម្រាប់សារធាតុដើម និងបច្ចេកវិទ្យាទំនើបផ្សេងទៀត។ ការផ្លាស់ប្តូរទៅក្នុងបញ្ជីអង្គភាព របស់នាយកដ្ឋានពាណិជ្ជកម្ម ត្រូវបានបញ្ចូលទៅក្នុងបញ្ជីឈ្មោះ សហព័ន្ធ ដែលគ្រោងនឹងបោះពុម្ពផ្សាយថ្ងៃសុក្រ។
នេះបើយោងតាមឯកសារបានប្រាប់ឲ្យដឹងថា Yangtze Memory Technology Co. ជាក្រុមហ៊ុនផលិតបន្ទះឈីបកុំព្យូទ័រ មានមូលដ្ឋាននៅកណ្តាលទីក្រុង Wuhan និងអង្គភាពជប៉ុនរបស់ខ្លួន ត្រូវបានបញ្ចូលក្នុងបញ្ជី សម្រាប់បង្កហានិភ័យយ៉ាងសំខាន់ នៃការចូលរួមក្នុងសកម្មភាព ដែលផ្ទុយនឹងសន្តិសុខជាតិ ឬផលប្រយោជន៍គោលនយោបាយការបរទេសរបស់ United States ៕ ដោយ៖លី ភីលីព
