អូតាវ៉ា៖ អ្នកសរសេរអត្ថបទម្នាក់បានឲ្យដឹងនៅក្នុងកាសែត The Globe and Mail កាលពីថ្ងៃអង្គារថា ការបាញ់ប្រហារទ្រង់ទ្រាយធំ បានក្លាយជារឿងធម្មតាទៅហើយ ដែលពួកគេបានបញ្ជូនអាមេរិក ចូលទៅក្នុងអំពើហិង្សាដោយកាំភ្លើងប្រចាំថ្ងៃ ដ៏គួរឱ្យភ័យខ្លាច។
លោក Gary Mason អ្នកសរសេរអត្ថបទកិច្ចការជាតិ បានឲ្យដឹងថា ជារៀងរាល់ឆ្នាំ សហរដ្ឋអាមេរិក កំពុងឈានទៅរកកំណត់ត្រាថ្មីមួយ សម្រាប់ការបាញ់ប្រហារទ្រង់ទ្រាយធំ ហើយឆ្នាំនេះ មិនមានករណីលើកលែងនោះទេ ដោយមានការបាញ់ប្រហារទ្រង់ទ្រាយធំជាង ២០០ ដង ហើយយ៉ាងហោចណាស់មនុស្ស ៤នាក់ត្រូវបានបាញ់សម្លាប់ ឬរងរបួសនៅក្នុងការបាញ់ប្រហារម្ដងៗ រហូតមកដល់ពេលនេះ។
អ្នកនិពន្ធរូបនេះ បានលើកឡើង ថាគ្មានឆន្ទៈនយោបាយ ឬអ្វីផ្សេងទៀត ដើម្បីធ្វើអ្វីអំពីវានោះទេ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិន ស៊ិនហួ។
នោះជារឿងដែលធ្វើឲ្យខូចចិត្តយ៉ាងពិតប្រាកដ។ កាំភ្លើងត្រូវបានបង្កប់ក្នុងវប្បធម៌អាមេរិកយ៉ាងជ្រៅហៅលែងលឺទៅហើយ ដែលមិនមានការងាកក្រោយឡើយ។ អ្នកនិពន្ធរូបនេះ បានលើកឡើងថា រដ្ឋមួយចំនួនដូចជាកាលីហ្វ័រញ៉ា បានអនុម័តច្បាប់កាំភ្លើងដ៏តឹងរ៉ឹង ប៉ុន្តែវាមិនបានបញ្ឈប់ការបាញ់ប្រហារទ្រង់ទ្រាយធំនោះទេ។ “វានៅតែងាយស្រួលពេកក្នុងការទទួលបានអាវុធពាក់កណ្តាលស្វ័យប្រវត្តិដ៏មានឥទ្ធិពលនៅទីនោះ”។
យោងតាមអ្នកសរសេរអត្ថបទរូបនេះ មានទ្រឹស្តីជាច្រើនអំពីមូលហេតុ ដែលការគ្រប់គ្រងកាំភ្លើង មានភាពចម្រូងចម្រាសខ្លាំងនៅក្នុងសហរដ្ឋអាមេរិក។
ភាគច្រើនជាជនជាតិអាមេរិកស្បែកស ដែលបដិសេធមិនព្រមបោះបង់អាវុធរបស់ពួកគេ ព្រោះវាជាអាវុធទាំងនោះ ដែលពង្រឹងអំណាចជនជាតិស្បែកស។
លោកបានបញ្ជាក់ថា កាំភ្លើងជាឧបករណ៍ការពារស្បែកសពីការផ្ដួលរំលំ ហើយវាមិនសំខាន់ទេថា តើមានការបាញ់ប្រហារច្រើនប៉ុណ្ណា កុមារប៉ុន្មាននាក់ត្រូវបានសម្លាប់ក្នុងថ្នាក់រៀន ឬអត្រាមនុស្សឃាតកើនឡើងខ្ពស់ប៉ុណ្ណានោះទេ៕ ប្រែសម្រួល ឈូក បូរ៉ា
