ប៉េកាំង ៖ ប្រព័ន្ធផ្សព្វផ្សាយរដ្ឋបានរាយការណ៍ថា នាយករដ្ឋមន្ត្រីចិនលោក លី កេឈាំង បានទទួលមរណភាពដោយសារគាំងបេះដូងក្នុងអាយុ ៦៨ ឆ្នាំនៅទីក្រុងសៀងហៃ នៅព្រឹកថ្ងៃសុក្រនេះ។
ទីភ្នាក់ងារសារព័ត៌មានចិនស៊ិនហួ បានឲ្យដឹងថា លោក លី បានទទួលមរណភាពហើយ បន្ទាប់ពីកិច្ចខិតខំប្រឹងប្រែងផ្នែកវេជ្ជសាស្ត្រដើម្បីសង្គ្រោះលោកបានបរាជ័យដោយសារគាំងបេះដូងភ្លាមៗ ។ លោកបានចូលនិវត្តន៍ ជានាយករដ្ឋមន្ត្រីកាលពីខែមីនា បន្ទាប់ពីបានបម្រើការរយៈពេល ៥ឆ្នាំពីរអាណត្តិ ហើយត្រូវបានជំនួសដោយលោក លី ឈាំង ។
នៅពេលបម្រើការក្រោមប្រធានាធិបតី លោក ស៊ី ជីនពីង ពីឆ្នាំ២០១៣ លោក លី បានមើលការខុសត្រូវ លើសេដ្ឋកិច្ចធំបំផុតទីពីរ របស់ពិភពលោក ដោយកំណែទម្រង់របស់លោកត្រូវបានគេហៅថា “Likonomics” ប៉ុន្តែតួនាទីរបស់នាយករដ្ឋមន្ត្រីបានធ្លាក់ចុះបន្តិចម្តងៗ នៅពេល ដែលលោក ស៊ី បានប្រមូលផ្តុំអំណាចនៅក្នុងដៃ របស់លោកផ្ទាល់ ។
អតីតប្រធានាធិបតី Hu Jintao ដែលលោកធ្វើការនៅសម្ព័ន្ធយុវជន កុម្មុយនិស្តចិន លោក លី ត្រូវបានគេមើលឃើញថា ជាអ្នកស្នងតំណែងដ៏មានសក្តានុពលរបស់លោក Hu ប៉ុន្តែបានចាញ់លោក ស៊ី ជីនពីង នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
កើតនៅខេត្ត Anhui ក្នុងខែកក្កដា ឆ្នាំ១៩៥៥ លោក លី បានចូលរួមជាមួយបក្សកុម្មុយនិស្ត ដែលកំពុងកាន់អំណាចនៅឆ្នាំ១៩៧៦ ។ លោកបានសិក្សាផ្នែកច្បាប់ នៅសាកលវិទ្យាល័យ Peking និងទទួលបានបណ្ឌិតផ្នែកសេដ្ឋកិច្ចពីសាកលវិទ្យាល័យ៕
ប្រែសម្រួល ឈូក បូរ៉ា
