តូក្យូ៖ ប្រភពពីទីភ្នាក់ងារ Xinhua បានផ្សព្វផ្សាយ នៅថ្ងៃទី៦ ខែមករា ឆ្នាំ២០២៤ថា ចំនួនអ្នកស្លាប់បានកើនឡើងដល់៩៤នាក់ហើយ ដោយចំនួនមនុស្ស មិនទាន់បានរាប់បញ្ចូល លើសពី២០០នាក់ នៅក្នុងខេត្ត Ishikawa ស្ថិតនៅភាគកណ្តាល នៃប្រទេសជប៉ុន កាលពីថ្ងៃសុក្រ ដែលមានរយៈពេល៤ថ្ងៃ ក្រោយពីការរញ្ជួយដីកម្រិត៧,៦រ៉ិចទ័រ បានវាយប្រហារជាបន្តបន្ទាប់ នៅក្នុងខេត្តនេះ និងតំបន់ជុំវិញរបស់ខ្លួន ដោយបង្កើនក្តីបារម្ភអំពីការកើនឡើង នៃការខូចខាត ស្របពេលមានការ ខិតខំប្រឹងប្រែងជាបន្តបន្ទាប់ ដើម្បីស្វែងរកអ្នក ដែលនៅរស់រានមានជីវិត ។
យោងតាមប្រព័ន្ធផ្សព្វផ្សាយ ក្នុងស្រុកបានផ្សាយថា មានមនុស្សសរុបចំនួន២២២នាក់ ត្រូវបានរាយការណ៍មកថា បានបាត់ខ្លួននៅខេត្ត Ishikawa គិតត្រឹមម៉ោង២និង០០នាទីរសៀលម៉ោង ក្នុងស្រុកកាលពីថ្ងៃសុក្រ ហើយអ្នកបាត់ខ្លួន ដែលមានចំនួនច្រើនជាមនុស្សចាស់ គឺបានប្រមូលផ្តុំគ្នាច្រើន នៅក្នុងទីក្រុង Wajima និង Suzu ។
អភិបាលក្រុង Shigeru Sakaguchi បានប្រាប់ដល់សារព័ត៌មានកាលពីព្រឹកថ្ងៃសុក្រយ៉ាងដូច្នេះថា អ្នកស្រុកជាង១០០នាក់ត្រូវបានគេប៉ាន់ស្មានថា បានជាប់នៅខាងក្រោម នៃអគារបាក់ ដែលបានដួលរលំនៅក្នុងទីក្រុងឆ្នេរសមុទ្រ Wajima ដែលរងគ្រោះខ្លាំងជាងគេ ក្រោយពីមានគ្រោះរញ្ជួយដី ចំថ្ងៃចូលឆ្នាំសកល ។
លោក Sakaguchi បានលើកឡើងថា ផ្លូវរបស់ក្រុង Wajima ត្រូវបានកាត់ផ្តាច់ ហើយមានគ្រោះបាក់ដីកើតឡើងជាញឹកញាប់ ដែលធ្វើឱ្យការ ស្វែងរកអ្នក នៅរស់រានមានជីវិត ជួបការលំបាក ដោយបានលើកឡើងទៀតថា កិច្ចខិតខំប្រឹងប្រែងជួយសង្គ្រោះ កំពុងផ្តោតលើកន្លែងដែលមនុស្ស បានឮសំឡេង ចេញពីកម្ទេចថ្មទាំងនោះ ៕
ប្រែសម្រួលដោយ៖ ម៉ៅ បុប្ផាមករា
