បរទេស ៖ យោងតាមការ ចេញផ្សាយរបស់ RT ប្រធានាធិបតីអាមេរិក លោក Joe Biden បានការពារការឆ្លើយតប របស់សហរដ្ឋអាមេរិក ចំពោះការវាយប្រហារ ដោយយន្តហោះគ្មានមនុស្សបើក នាពេលថ្មីៗនេះ ដែលបានបណ្តាលឲ្យទាហាន អាមេរិក ៣នាក់ស្លាប់ ដោយអះអាងថា ការវាយឆ្មក់ តាមអាកាសដែលបានកំណត់ គោលដៅទៅលើក្រុមជីវពលនៅក្នុងប្រទេសអ៊ីរ៉ាក់ និងស៊ីរី ដែលគាំទ្រ ដោយអ៊ីរ៉ង់នឹងនៅតែបន្ត។
នៅក្នុងសេចក្តីថ្លែង ការណ៍មួយ ដែលបានចេញផ្សាយកាលពីថ្ងៃសុក្រ លោក Biden បាននិយាយថាលោកផ្ទាល់ បានបញ្ជាឱ្យឆ្លើយតប របស់មន្ទីរបញ្ចកោណ ចំពោះការវាយប្រហារ ដោយយន្តហោះគ្មានមនុស្ស បើកកាលពីចុងសប្តាហ៍មុន ទៅលើមូលដ្ឋានយោធាហ្សកដានី ដែលជាកន្លែងមានវត្តមាន របស់ទាហានអាមេរិក។
ប្រមុខការពារជាតិអាមេរិក លោក Lloyd Austin ក៏បានព្រមានថា ការវាយប្រហារ ចុងក្រោយនេះ គឺគ្រាន់តែជាការចាប់ផ្តើម នៃការឆ្លើយតបរបស់អាមេរិកប៉ុណ្ណោះ ដោយបន្ថែមថា ប្រធានាធិបតីបាននឹង កំពុងធ្វើការដឹកនាំសកម្មភាពបន្ថែម ។
គួរឲ្យដឹងដែរថា ទីបញ្ជាការកណ្តាល របស់សហរដ្ឋអាមេរិក (CENTCOM) ដែលគ្រប់គ្រងប្រតិបត្តិការ នៅមជ្ឈិមបូព៌ា និងអាស៊ីកណ្តាល បានប្រកាសពីមុនថា ខ្លួនបានធ្វើការវាយឆ្មក់ តាមអាកាសលើគោលដៅ ជាង៨៥លើកនៅទូទាំងអ៊ីរ៉ាក់ និងស៊ីរី៕
ប្រែសម្រួល៖ស៊ុនលី
